Bank hrang hrangte hnathawh dan thlirletna neih a ni

Kolasib District chhunga Bank hrang hrangte hnathawh dan thlirin nimin khan District Bawrhsap hovin thutkhawm neih a ni.

Kolasib DC Conference Hall-a District Consultative Committee (DCC), District Level Security Committee (DLSC) leh District Level Review Committee (DLRC) thutkhawm ah hian kum 2023 October thla atanga December thla (3rd Quarter, 2023-24) chhunga Kolasib District-a Bank hrang hrangte hnathawh thlirlet niin hmachhawp an neih leh hmalak zui dan tur te sawiho nghal a ni a. Kolasib District chhunga mihring 2,000 aia tlem chenna khaw 29 te chu mipuiin Bank kaltlanga hamthatna hrang hrang an chhawr ve theih nan an khuaah Bank Branch emaw, Business Correspondent emaw, Indian Postal Payment Bank emaw dah kim a nih thu tarlan a ni a. Hei bakah hian Bank hrang hrang kaltlang mipui ten hamthatna an dawn theihna tur bawhzui a nih dan te thlirho a ni bawk.

He hunah hian Bank leh mipui sum vawnhimna (security) lam te pawh sawiho a ni a. RBI-in Rs. 2,000/- note a hnuhkir chungchang pawh tarlan niin Rs. 2,000/- tlang hi Bank-a thleng theih hun a tawp tawh a. RBI-in India rama Issue Office 19 a puan ah te chuan la thleng theih niin, heti ang thleng tur nei chuan dak (post) kaltlangin dilna lehkha nen Issue Office-ah hian thawn tur a ni a; a thlengna pawisa chu Bank Account kal tlangin a lut dawn a. Mizoram tana Issue Office hnai ber chu Guwahati a nih thu tarlan a ni bawk.