Sawrkar khalh ngil thei ber chu Opposition leh Media te an ni - I&PR Minister

I&PR Minister Dr. Vanlalthlana chuan Sawrkar reng reng veng thei tu leh khalh ngil thei ber chu Opposition Party-te leh chanchinbu mi, Media kan tih mai te an nih thu sawiin, Journalist te chu Pawl leh Sawrkar Press Release bakah mahni a chanchin thar leh thuthar lakkhawm kawngah tan la lehzual turin a chah bawk.

I&PR Auditorium, Aizawl-a Kumthar inhlantharna leh thingpui inhona hun nimin-a Mizoram Journalists' Association (MJA) member-te leh Directorate of Information & Public Relations-a thawktute tana buatsaih a hmanpuina ah he thu hi sawiin I&PR Minister Dr.Vanlalthlana chuan MJA leh I&PR a thawkte chu kumthar duhsakna hlanin Mizorama chanchin lakkhawm leh thehdarh khawvelah tun hmain lemziak, Cartoonist angin a lo in hman tawh dan te a sawi a. Sawrkar reng reng veng thei tu leh khalh ngil thei ber chu Opposition Party-te leh chanchinbu mi, Media kan tih mai te an ni tih sawiin, “A bik takin ram siamthatna kawngah te, ram vei kawngah te, journalism leh journalist te hian dinhmun pawimawh tak in luah a, chumi hre reng chungin ka thawhpui, kan chanchinbu mite leh thuthar te hi Sawrkar min venpuia thurawn te min pe turin ka chah duh che u a ni,” a ti.

Thuthar lakkhawm chungchang sawiin Minister chuan, Investigative Journalism-ah tan lakna tur a awm thu te, RTI hman tangkai lehzual dan kawng dap a tul thu te, tunlai Journalism a thil thar Data Mining leh Data Journalism chungchanga hma thar lakna tur a awm thu te a sawi lang a. Pawl leh Sawrkar Press Release bakah mahnia chanchin thar leh thuthar lakkhawm peih a ngaih thu sawiin, hemi kawngah hian tan la lehzual turin a chah a. Chanchinbumi ten Mizoram Journalist Welfare Fund leh Press Tour te an tangkaipui chu lawmawm a tih thu sawiin, Welfare Fund chu indaih lohna a san avangin nuai 20 atanga nuai 25 a tihpun rawt mek a nih thu te, Press Tour te buatsaih leh dan kawng ngaihtuah a nih tur thu te leh journalist te tana pension Scheme Sawrkar hmasa in a rem tih tawh te chu a taka hman a nih tur thu te a sawilang bawk.

Nimin-a he hun hman hi I&PR Director C. Lalnunkima chuan kaihruaiin MJA General Hqrs. President C. Lalrambuatsaiha pawhin thu a sawi a, I&PR Joint Director F. Lalfakzuala chuan hunserh hmangin P.B. Lianthangpuii, Joint Director, I&PR Department-in lawmthu sawiin inhlantharna leh thingpui inhona hun hman hi a khar a ni.

I&PR Minister hova he hun hman a nih hnu hian Minister hian I&PR Directorate Office bulah sak thar leh luahluh tawh ‘Lianchhairi Run’ chu a fang nghal bawk a ni.