Sawrkar hnathawk zingah hrem ngai awm tawh lo se a duh thu Home Minister in a sawi

Home Minister K.Sapdanga chuan sawrkar hnathawk zingah hrem ngai awm tawh lo se a duh thu a sawi.

Home Minister hian tunhnaia Vairengte Police Station-a hnathawk Police Officer pahnih Checkgate-a pawisa khawna puh an nih avangin an hna atanga chawlh lailawk tir an nih chungchang a Official Social Media Platform hrang hrangah tarlangin, mipuiin sawrkar inrelbawlnaah “Kalphung thar hmel an hmuh theih nan Home Department-in hma kan hruai ang,” tih a lo sawi tawh angin Department chhunga thawktute pawh an tang hle tih a sawi a. Dan rorelna an tih, 'Rule of Law' chu a nihna anga hmang tur chuan hnathawk thate chawimawi leh hnathawk tha lo te hrem, 'Reward & Punishment Mechanism' chu chak taka kenkawh a tul a, Chief Minister-in a sawi angin, sawrkar chuan politics thilah emaw, sawrkar inrelbawlna chhungah emaw, tunhma lama tih dik loh chhuilet a hrem ngawr ngawr an tum lo a, an sawrkar chinah erawh hetiang thil dik lo hi a awm an remti tawh lo thung tih a sawi a ni. 

Home Minister K. Sapdanga chuan, an kal dan tur mipui leh sawrkar hnathawkten an hriat theih nan sawrkar atanga 'Order' a chhuah hma atangin a theih anga tam chanchin thar leh Social Media lamah an tichhuak thin tih a sawi a, heti chunga dan pela kal an lo la awm chu pawi a tih thu leh hetiang thil dik lo titute man chhuak a, thil dik lo tibo tura rim taka thawktu Home Department-a a thawhpuite chungah lawmthu sawiin, Sawrkar hnathawkte chep taka siam chu an tum a ni lo a, danin a phal chhungah zalen taka hnathawk thei tura siam chu an duh ber a nih thu a sawi.Tunhnuah hetianga hremna lek ngai hi awm tawh lo se a duh thu a sawi rualin, an hmalaknaah khawng takin an kal zel dawn tih a sawi bawk.

Tunhnai khan Mizoram Police chuan Vairengte Police Checkgate a Duty Police Officer pahnih suspend in Police Officer pakhat leh Constable paruk an transfer a. Thudawn danin January 5, 2023-ah khan Vairengte Police Checkgate-ah hian hnamdang Driver laka dan lova pawisa lak a awm nia hriat a ni a, hemi kaihhnawihah hian January 5 a duty Police SI leh ASI chu suspend niin, OC bakah Constable paruk transfer an ni a. Dan loa pawisa lak chungchang hi chhui chian a ni dawn a, a tul anga hmalak chhunzawm a ni ang. 

Tarlan tawh angin tunhnai khan Mizoram sawrkar-a Home Secretary chuan ramri-a checkgate hrang hranga duty-te chu danin a phut bak pawisa la lo turin a hriattir a, dan loa pawisa late report na tur a tarlang nghal bawk a ni.