Mipui tam zawkin PM-KISAN an dawn theih nan hmalakna chak taka kalpui mek a ni

Mizoram-a PM-KISAN kalpui mek hnuaiah sawrkar kum kal mek, nikum April atanga kumin March thla thlengin cheng vbc. 50 vel mipuiten an dawn theihna turin hmalakna chak takin kalpui mek a ni tih Agriculture Department Deputy Director leh PM-KISAN Nodal Officer VL. Hmangaihchhunga chuan a sawi.

Agriculture Department-a Deputy Director VL. Hmangaihchhunga hian PM KISAN an kalpui chungchanga zawhna chhangin tunah hian January thlaa pekchhuah tur 16th Installment atana tihfel ngai ti vek tawh hi mi 73,065 an awm tih sawiin, mi 40,933 te chu tihfel loh an la ni tih a sawi a. PM-KISAN ah Aadhar leh Bank thlunzawm a ngai tih sawiin, thlunzawm tawh leh ram neih ziahfel tawh te chu E-KYC tih a ngai leh tih a sawi a, inziaklut tawh te tan thla 4 danah Rs. 2000/- dawn theih a ni a, kum khat-ah Rs. 6000/- an dawng thei tih a sawi a, a thar inziaklut duh tan pawh kawng hawn a nih thu leh khawpui lam tan pawh inziahluh thar a theih tawh tih a sawi bawk.

Agriculture Department-a Deputy Director chuan Mizoram pumah PM-KISAN dawn kawnga harsatna tawk mi 88,058 lai an awm thu pawh sawiin, heng harsatna tawk te pui turin Village Level Nodal Officer mi 83 an ruat tawh tih a sawi a, heng te hian khaw tinah kalin harsatna tawk te zawng chhuakin an pui dawn tih sawiin, heng harsatna tawk te hi mahni-a inbuaipui theih niin District Office-ah Aadhar Card kengin kal theih a ni tih a sawi bawk.

PM-KISAN dawn kawnga harsatna tawk ten Community Service Centre kaltlangin dawng lo ten an dawn theihna tur leh dawng thin dawng tawhlo te tan mahni in buaipuiin harsatna hrang hrang a chinfel theih tih a sawi a, CSC atang leh Dak In hrang hrang atangin buaina chinfel theih a ni tih sawiin, mahni thil dil te ngaihsak a, mahni chanvo ngai pawimawh turin a chah bawk.

Agriculture Deputy Director VL. Hmangaihchhunga chuan Viksit Bharat Sankalp Yatra (VBSY) kalpui mekah Agriculture Department hnuaia Scheme hrang hrang 4- PM-KISAN, KISAN Credit Card, PM PRANAM leh PMKMDY–Agriculture Pension Scheme te mipuiin an hriat zau theih nan inzirtir mek a nih thu a sawi a. He Pension Scheme-ah hian kum 18 atanga kum 40 inkar inziahluh theih a ni a, Kisan Credit Card-ah hian Bank nen inthlunzawmin PM-KISAN-a inziaklut zawng zawngte tan hamthatna tam tak a awm, a ti a. Kuthnathawktute tan Loan awlsam zawkin khawi Bank-ah pawh a lak theih a, a tirah za zela 7 pung awmin tha taka loan rulh chuan kum 1 hnuah za zela 4 pung awmin a tla thla thei tiha sawi a, Scheme dangah pawh hamthatna tam tak a awm a, thawktute an inhawng reng a ni, a ti bawk.