Rajya Sabha MP in ‘Reitlang Lungdawh’ a hawng

Reiek Branch YMA siam ‘Reitlang Lungdawh’ chu Inrinni khan Rajya Sabha MP K. Vanlalvena’n a hawng.

He Lungdawh hi Zoram khawvela Reiek khaw mi hmingthate chawimawi nana dawh a ni a. MP Fund 2021-2023 atanga sum hmuh Rs. 12,50,000/- senga dawh a ni a.  Reitlang Lungdawh-ah hian Lungdawh 23 a awm a. Lungdawh pathum-ah chuan mi pakhat ai a tam hming a chuang a, Reiek Lal-te Lungdawh-ah hian Mangpawrha Sailo atanga Laltluanga Sailo thleng tarlan a ni. Indopui pakhatna leh pahnihna a kalte puala Lungdawh-ah hian mi 3 ve ve hming a chuang bawk a. Indopui pahnihna a tel ve zinga pakhat chu Maymyo Sanapui avangin Literature huang chhungah pawh a sengluh tel theih bawk. A dang zawngte chu mimal Lungdawh a ni thung a. He Lungdawh-ah hian zirna lamtluang atanga Reiek khaw tana hming chher ta an tam ber a. Indian Administrative Service (IAS) mi pali an lang a, Indian Forest Service (IFS) atangin mi pakhat a awm bawk a. Mizoram Civil Service (MCS) atangin mi pahnih bakah Mizo zinga Political Science Subject-a Doctorate Degree la hmasa ber leh Reiek khua atanga Mizoram University Professor pakhat a awm bawk a. Mizo zinga Bachelor of Arts pass hmasa ber dawttu a awm bawk.