Saipum-ah Broom Processing Unit (Warehouse) hawng

Saipum Broom Growers' Cooperative Society (SABCOS) te'n Hmunphiah sawngbawlna atana Broom Processing Unit (Warehouse) an sak chu nimin khan hawn a ni.

FOCUS Mizoram hmalaknaa Market Access Facillity (MAF) hnuaia sum hmuh hmanga Saipum Zero Point-a Hmunphiah sawngbawlna atana Broom Processing Unit (Warehouse) sak thar hi FOCUS Mizoram State Project Director Lalengzami Haolai chuan a hawng a, Saipum Broom Processing Unit sakna atan hian cheng nuai 25 sen niin hemi atang hian SABCOS lamin 10% thawh in, a pawisa fai chuan cheng nuai 2.5 a ni a. A bak 90% (cheng nuai 22.5) chu FOCUS Mizoram in a tum thung a. Warehouse sakna leh khawl dahna bakah hian a hmunhma laih zawlna leh a panna kawng sialna te pawh project hian a keng tel a ni.

Nimin-a Saipum Broom Processing Unit hawnna hun hi LRS &WC Joint Director Rosy Lalmuansangi Hmar chuan kaihruaiin, SABCOS Chairman CS. Lalthlamuanga'n report leh lawmthu sawiin, FOCUS Kolasib District Project Manager Lalremruata Sailo leh Kolasib District Cooperative Officer Lalthlamuana te pawhin thu an sawi a ni.

SABCOS Chairman report-a tar lan a nih danin, Saipum khuaah hian In 580 vel awmin heng zinga za zela 80 vel chu Hmunphiah huan nei an ni a. Kumtin Hmunphiah a hringin quintal 10,000 atanga 13,000 vel thar thinin, Hmunphiah hralhna atang hian Saipum khua hian cheng nuai 300 atanga cheng nuai 400 vel an la lut thin a ni. Saipum khuaa Hmunphiah chingtute'n Hmunphiah an tharchhuah hi anmahniin a man (rate) bithliah lovin, a leitute'n a rate an bithliahsak thin a. Tunah chuan Warehouse-ah hian an Hmunphiah tharchhuahte dahkhawmin, Society kaltlangin an hralh thin tawh dawn a. Saipum Broom Processing Unit hian Warehouse bakah, khawl chi hrang hrang - Hmunphiah tihrona tur Tunnel Dryer leh Exhaust Fan leh Ceiling Fan te a keng tel a. Warehouse hi Hmunphiah quintal 150 vel leng tura buatsaih a ni.

Comments

Popular News (Last 30 Days)

LPG man bithliah thar