Ruihhlo ngai enkawl kawnga thawhho dan tur sawiho

Mizoram-a ruihhlo ngaite enkawlna kawngah thawhhona a awm theih leh theih loh chungchang sawiho in nimin khan Chief Minister Lalduhoma leh Presbyterian Church of USA aiawhte chu an inkawm.

Chief Minister Pisa-a an inkawmna ah hian Presbyterian Church of USA aiawha thu te hian tunhnaia Aizawl leh a chhehvela ruihhlo lama harsatna nei an hmuh te leh ruihhlo ngai enkawlna an tlawh theih chinte atanga an thil hmuh dan leh hmalakna awm thei tur nia an ngaihte an sawi a. US lama an Kohhran leh mi inphal, sum leh pai thawh thei dap lamah harsatna an neih loh tur thu an sawi rualin, thawklehkhata hmalakna lian tak kalpui nghal mai erawh a harsat deuh theih thu an tarlang a ni. He inkawmna a thil pawimawh hrang hrang te an sawiho hnuah Chief Minister hian an hmalak theih dan tur ruahmanna mumal nei rang turin a hrilh a, chumi mil chuan hmalak dan tur an sawi zui leh dawn a ni.

He inkawmna ah hian Chief Minister hi Social Welfare Minister Lalrinpuii leh Excise & Narcotics Department changtu Minister Lalnghinglova Hmar ten tawiawmin Presbyterian Church of USA aiawh hian Rev. Vanlalrosanga Ralte leh a thawhpuite an rawn kal a ni.