Foundation for Drugs Free Mizoram hruaitute kawm

Chief Minister Lalduhoma chuan nimin khan Foundation for Drugs Free Mizoram hruaitute a Pisa-ah kawmin an hmalak dan hrang hrang te a ngaihthlak sak.

Foundation for Drugs Free Mizoram hruaitute leh Chief Minister inkawmna ah hian Foundation for Drugs Free Mizoram President V. Lalnunthara chuan an hmalakna tlangpui sawiin, an pawl hi kum 2019 a ding an nih thu leh ruihhlo ngai tawh te enkawl lam ai mahin tleirawl, ruihhlo laka la fihlim mek te ruihhlo bawiha an luh loh nana invenna lama an beih nasat zawk thu a sawi a. An pawl member te thawhkhawm sum hmangin mithiam zawkte sawmin Team of Resource Persons an din a, anni hmang hian kum 4 chhungin School leh Kohhran hmun 66 tlawh tawhin; tleirawl mi 12,500 te ruihhlo laka fihlim turin signature card ah an lo intiam tawh a ni.

Chief Minister chuan, sawrkar tanpuina tel lova member inphal te thawhkhawm liau liauva hmalakna tha tak tak an kalpui avangin lawmthu a sawi a. An hmalakna ten rah tha a chhuah ngei a beisei thu hrilhin, zau zawka hma an lak zel theihnan duhsakna a hlan a. Ruihhlo ngaite chhanchhuahna tur atana sawrkarin hma a lak tawh chinte pawh a hrilh a ni. He pawlah hian Chief Minister Lalduhoma hi kum kalta atangin Patron Member a lo ni tawh a, an Patron member Chief Minister ni ta an lawmpuizia entirnan thilpek an hlan nghe nghe a ni. Tunah hian member 950 an awm mek a, an zingah hian MLA nilai 11 an tel a ni.