Chapchar Kut 2024 hman dan tur thlirlawkna nei

Chapchar Kut 2024 hman dan tur chu nimin khan Art & Culture Minister C. Lalsawivunga hovin a Pisa-ah thlirlawk a ni a, Chief Minister hova thutkhawm neih huna chhawpchhuah turin rawtna hrang hrang siam a ni.

He thutkhawm ah hian Art & Culture Minister C. Lalsawivunga chuan Chapchar Kut chu Mizote'n Kut kan neih tlemte zinga pawimawh leh ngaihven hlawh tak a nih thu sawiin, hnam ziarang leh nunphungte chawinun leh vawnhim nana hman tangkai a tul thu a sawi a. Kalkhawmte chu Chapchar Kut lawm tawh thin dan aia tha leh her danglam ngaite a awm a nih chuan inthlahrung hauh lova thurawn pe hreh lo turin a chah a. Zau zawka khawvel hriat leh hmuh theih tura Mizo hnam ziarang leh nunphungte phochhuah a nih theih nana hmalak dan kawng ngaihtuaha tanlak tlan a pawimawh thu a sawi bawk.

Nimin-a thutkhawmah hian Chapchar Kut lo hman thin tawh dan te leh NGO te nena thawhhona hnuaiah hlawhtling taka Chapchar Kut lawm thin dante ngaihthlak a ni a. Chapchar Kut Organising Committee chungchangte, ngaihtuahna zau zawk senga Chapchar Kut lawm a nih theih dan turte, senso ngaite, lawm hun chhung turte, lawmna tur hmunhma, lawm dan tur program duan chhin leh kut kentel pawimawh dang Food Stall, Exhibition Stall, Photo Gallery/Art Exhibition, Flower Show, Zokhua leh a kaihhnawih pawimawh dangte pawh sawiho a ni a. Chapchar Kut chu Mizo nun zemawi thangtharte hnena zirtir nana tangkai taka hman thiam a tul thu tarlan a ni a. Rawtna siam leh tul ni a hriatte chu thutawp siamtu tur Chief Minister kaihhruai Chapchar Kut Organising Committee thutkhawm neih huna pawmpui tura chhawpchhuah nise tiin rawtna hrang hrangte sawiho a ni bawk.