Ruihhlo dona sawrkar in tih mai mai a tum lo tih lo hriat sak turin Chief Minister in a chah

Chief Minister Lalduhoma chuan ruihhlo dona chu sawrkar in tih mai mai a tum lo tih he thila inhnamhnawih thin te leh mi tin ten lo hriat sak tura chahin, tlawmngai pawlte ti chak tura Excise Acts siamrem pawh a tul chho dawn niaa a hriat thu a sawi bawk.

Excise & Narcotics Department chuan Inrinni khan Aizawl-a Commissionerate of Excise & Narcotics Conference Hall-ah Ruihhlo do chungchanga Kohhran thalai hruaitute nena inkawmhona buatsaihin he hunah hian Chief Minister Lalduhoma chuan ruihhlo in thalaite min run mek a, a dolet turin thalaite bawk sipai-ah kan siam a ngai tih sawiin, chumi bul chu an tan tih a sawi a, “Sawrkar min thawhpui rawh u kan ti satliah lo, kan thawkho zawk dawn a ni,” a ti a. “Ruihhlo dona hi sawrkar hian tih mai mai a tum lo tih he thila inhnamhnawih thin te leh mi tinin min hriatsak ang che u. Department te leh Excise Department ngei pawh fimkhur tak leh dik taka kal turin ka ngen che u a ni,” a ti. Ruihhlo dona kawnga hmalak dan turah Central YMA hruaitute a sawipui tawh thu pawh sawiin Chief Minister chuan, Tlawmngai pawl te tichak tura Excise Acts han siamrem pawh a tul chho dawn nia a hriat thu a sawi a. “Hmanlai chuan kan pipu ten ramhuaite an hlauva, Pu Cana te an hlau a, fimkhur takin an nung thin. Tunah chuan miin Pathian a hlau lova, ramhuai a hlau lova, sawrkar a hlau bawk silova, a zalen lutuka chu chu a zo ta thin lo a ni. Vawiin atang chuan Excise Department hi ruihhlo tawlhruk chingte leh a kaihhnawih dan bawhchhiate tan lo hlauhawm tawh ang che u,” a ti. An Department harsatna te chu sawrkarin theihtawp chhuaha a ngaihtuahsak tur thu a hrilh bawk.

Chief Minister chuan inrawnkhawmna-a telte chu ‘Zu khap bur a tha ber em, kan thatpui nge chhiatpui’ tihte sawiho tura chahin, “Mizote hi Committee-a kan rel leh mimal ngaihdan a in ang lo fo. Inrawnkhawmna hi ruihhloin a sal behte tan chhanchhuahna dar vawtu a nih ngei ka beisei,” a ti a. “Ruihhlo mi in a ngaih tawh chuan a hmangaih zui tlat thin a, chu chuan a chhungte hnen ata a la hrang hret hret a, chhungkaw kimin maicham kan buatsaih hlei thei lova, nupa inthenna te a pung a, chhungkua ah Pathian ram a thleng thei thin lo a ni,” a ti bawk.

He hunah hian Excise & Narcotics Department changtu Minister Lalnghinglova Hmar chuan ruihhlo dona chu thalaite nena kalpui ngai a nih avangin Kohhran thalaite nen an inrawnkhawm dawn tih sawiin, “Sawrkarin a tihtur te ringawt kan sawi dawn lova, Kohhran thalaiah engtinnge ruihhlo kan do ang tihte pawh kan sawiho anga, sawrkar nena thawhho dan kan ngaihtuah dawn a ni,” a ti a. “Kohhran thalai tangkaina sawrkarin a hriaa, in kalpui mek member te thatna tura in hnathawh thin kha nasa zawka kan kalpui theih nan kan titi ho dawn a ni,” tiin Kohhran tin thalai hruaitute chu an inkhawmpui ah ruihhlo that lohzia zirtirna thu sawina hun minute sawm (10) tal ruahman sak turin a ngen bawk.

He hunah hian Excise & Narcotics Department-a Joint Commissioner Peter Zohming-thanga chuan an Department dinhmun leh hnathawh dan tlangpui tarlangin, an Department-ah hian thawktu an vaiin 478 an awm mek a. An chhinchhiah danin kum 1984 atanga Zirtawpni (January 12, 2024) thleng khan Mizoram-ah mi 1811 ruihhlo vangin an thi tawh a, an zinga 1592 chu Mipa niin midang 219 te chu hmeichhia an ni a. Chhinchhiah loh tam tak an la awm an rin thu pawh sawiin, nikum bikah mi 74 ruihhlo vangin an thi a, kuminah mi pakhat a thi tawh bawk a ni.

He hunah hian sawrkar mi pawimawh hrang hrangte pawh telin Kohhran hrang hrang 12 atanga kalkhawm thalaite nen inkawmna leh sawihona hun hman a ni.