Serchhip-ah National Youth Day hman a ni

Kum 1985 atanga India rama hman thin ‘National Youth Day’ chu nimin, January 12, 2024 khan rampumah hman leh niin Serchhip-ah pawh he ni pual hian Govt. Serchhip College-ah he ni pual hian hun hman a ni.

Nehru Yuva Kendra (NYK) Serchhip District leh Govt. Serchhip College te tangkawp buatsaiha ‘National Youth Day’ puala he hun hman hi Govt. Serchhip College a NSS Programme Officer H. Lalchhanhima chuan kaihruaiin he hun hmanpuitu Govt. Serchhip College Principal C. Laldintluanga chuan thalaite chu ram leh hnam innghahna an ni tih a sawi a, khawtlang sualna leh ruihhlo dona kawnga tangrual tur leh khua, Veng leh ram tinuamtu nih tum theuh turin a sawm bawk.

India sawrkar chuan Swami Vivekananda pian champha, January 12 chu kum 1984 khan ‘National Youth Day’ a hmang tura puangin kum 1985 atang khan he ni pual hian hun hman thin a ni a, hemi Hapta chhung, January 13-19, 2024 hi ‘National Youth Week’ ti a hman tura ruahman a ni a. Hemi denchhen hian thalaite tan kawng hrang hrangah inelna te buatsaihin kawng hrang hrangah mipui zirtirna kalpui a ni bawk.

Nimin-a Serchhip-a National Youth Day puala hun hman a nih rual hian he ni puala Prime Minister Narendra Modi hova Nashik-a hun hman chu biakhmuh theihna hmanga thlirho a ni bawk.