RNU ten tha zawka chanchinthar puan dan tur zirho

Hmarchhak State-a Akashvani Regional News Unit (RNU) te’n tha zawka chanchin thar an puanchhuah theih dan tur zirhona chu nimin khan Tripura khawpui Agartala-ah neih a ni.

RNU hotute leh Akashvani Part Time Correspondent (PTC)-te tana awmze nei lehzuala chanchin thar puan darh a nih theih nana ‘Content Synergy Workshop of Akashvani for Capacity Building’ tih thupui hmanga ni khat awh Workshop buatsaih hi Principal Director General (News & Akashvani), Dr. Vasudha Gupta-i chuan hmanpuiin, hmarchhak Akashvani hotute leh PTC te tana Workshop buatsaih a ni chu lawmawm a tih thu a sawi a. Workshop-a telte chu anmahni State leh District-ah theuh mipuiten chanchin thar dik leh rintlak an hriat theih nana thahnemngai taka thawk turin a fuih a. Social Media-a thu lêngvela innghat mai lovin an vela thil thlengte chu a chhan leh váng chiang taka hriat tum tur leh anmahni State RNU-ah theuh chanchin thar dik leh thahnem zawk thawn thin turin a fuih a ni.

He Workshop-ah hian mithiam hrang hrangin zirtirna an pe a, PTC ten zawhna an neihte zawtin Mizoram atangin Station Director DR. Lalropuia hovin thawktu dangte leh District thenkhat-a PTC te an tel a, an zingah hian Serchhip District atangin C. Lalhminghlua a tel a ni.