Nikum chhungin Mizoram-ah Heroin man a tam

Kum kalta 2023 chhung khan Mizoram Police leh Excise and Narcotics Department-te chuan Heroin kg 147 leh gram 414 an man a, ruihhlo hmansual vangin mi 76 an thi bawk.

Mizoram Police te hian nikum chhung khan Heroin kg. 68 leh gram 55 manin Excise and Narcotics Department in kg. 79 leh gram 359 an man bawk a. Heng bakah hian Police te hian Methamphetamine kg. 154.172 manin Crystal Meth (a mum ni lo) hi kg 49.5 an man a, Opium kg. 4.918 manin Ganja kg. 112.943 an man a, Pseudoephedrine kg. 210.72 an man bawk. Hemi chhung vek hian Excise & Narcotuics Department hian Methamphetamine kg 113.222 manin Opium kg. 367 an man a, Ganja kg. 181.267 manin Pseudoephedrine kg 5.948 an man bawk a. Police te chuan ruihhlo kaihhnawih ah hian thubuai 273 ziaklutin mi 386 an man bawk a ni.

Kum dang ngaihtuahin nikum chhunga ruihhlo man hi a tam hle a, kum hmasa 2022 a man aiin a letin a tam a, hetianga ruihhlo tawlhruk leh man a tam chhan hi dan kengkawhtute chuan Myanmar ram sawrkarna sipai-in an hnehlak vang ni-ah an ngai a ni.

Nikum chhung khan Mizoram-ah damdawi hmansual avangin mi 76-in nunna an chan bawk a, an zinga 12 hi hmeichhia niin midang 64 te chu mipa an ni a. Nikum kha kum 19 kalta chhunga Mizorama ruihhlo hmansual vanga thi an tam ber kum a ni bawk.