Nagaland Deputy CM in Mizoram CM a kawm

Nagaland Deputy Chief Minister Y. Patton chuan nimin tlai khan Mizoram Chief Minister Lalduhoma chu a chenna Bungalow-ah tlawhin thu pawimawh hrang hrang an sawidun.

Nagaland Deputy Chief Minister hian Mizoram-ah sawrkar thar chak tak a siam avanga a lawmpui thu Chief Minister Lalduhoma chu hrilhin, Naga te leh Mizote chu thlahtute atanga unau leh inhnai tak nia a lan thu sawiin, chuvang chuan an tan pawh Chief Minister a nih thu a sawi a. Lengpui a lo thlen atanga Aizawl khawpui chhung a kal tawhna chinah Mizoram mipuiten a kaihhruai sawrkar an thlawp tha hlea a hriat thu leh an hlim hle nia a hmuh thu a hrilh bawk.

Nagaland Deputy Chief Minister Y. Patton hian Myanmar leh India ramri hung chu Naga mipuite tan pawh thil pawm theih loh a ni tih sawiin, “Naga mipui zatve deuhthaw hi Myanmar ramah an cheng a, tuna kan ramri hman mek kan-a In leh lo sa, an chenna In pindan thenkhat India lama awm a, a pindan dang thenkhat Myanmar lama awm te pawh kan nei a ni,” tiin Chuvang chuan Naga mipuiten ramri hung hi an rem ti thei ngai dawn lo tih a sawi a, “In dinhmun leh kan dinhmun hi thuhmun reng a ni,” a ti bawk.

Mizoram Chief Minister Lalduhoma chu Y. Patton hian Nagaland-a zin tura sawmin, “Nagaland hian Mizo Chief Secretary pathum kan nei tawh a, Addl. Chief Secretary pakhat kan nei tawh bawk a, chutiang khawpa inpawh chu kan nih avang chuan i rawn zin ve ngei hi kan beisei a ni,” a ti a. Chief Minister hian tihhlawhtlin sak ngei a tum tur thu a hrilh bawk a ni.

An inkawmnaah hian hmarchhak State ten hma an sawn zelna tura hmalakna tur pawimawh nia an hriat te, a tul anga thawhho dan tur leh tun hnaia Chief Minister-in Delhi a tlawh chungchang te leh thil pawimawh dangte an sawidun a ni.

Comments

Popular News (Last 30 Days)

LPG man bithliah thar