Ration Card 2,86,523 awmin mi 6 in Card an thehlut

Mizoram pumah Ration Card 2,86,523 a awm mek a, thla tina Mizoram in buhfai a mamawh chu quintals 97,000 chuang niin Not Entitled for Ration (NER) Card siam turin mi paruk te chuan sawrkar-ah Ration Card an thehlut tawh.

Food, Civil Supplies & Consumer Affiars Department thawktute sawi danin Mizoran-a Ration Card awm mek 286,523 te hi Card Eng (AAY Card) 25,796, Card Pawl (PHH Card) 148,331 leh Card Var (Non-NFSA) 112,396 te an ni. Chhinchhiah danin Ration Card a hming chuang zawng zawng hi mi 1,167,757 an ni a, heng te hi AAY-ah mi 64,164, PHH-ah mi 632,374 leh Non-NFSA ah mi 471,219 te an ni.

FCS&CA thawktu te chuan thla tin Mizoram chuan ration buhfai sem tur atan quintals 97,000 vel a mamawh tih sawiin, Buhfai hi Card Eng leh Card Pawl te tan sawrkar laipui chuan thla tin quintals 59,478 a thlawnin a rawn pe thin tih an sawi a, a bak thla tin buhfai leina senso atan cheng vbc. 19 vel an seng thin niin an sawi a. FCS&CA Minister in Card var a Ration la thin te buhfai man sawrkarin tumsak tawh loh a tum nia a sawi chungchang zawhna chhangin Department lam chua rawtna chi hrang hrang 10 vel sawrkarah an thehlut a. Thutlukna chu sawrkar thuneitu sang Cabinet thutlukna tur a nih thu an sawi bawk.

Food, Civil Supplies & Consumer Affairs Department in mipuite hnena ngenna siama Ration buhfai lakna tur ni lo document pawimawh atana hmang duh tan Not Entitled for Ration (NER) Card siam tura mipui a ngenna ngai pawimawhin mi 6 in an Ration Card chu NER a siam turin department ah an thehlut tawh nia thudawn a ni bawk a. FCS&CA Department chuan Ration buhfai chu mi harsa zualte ei leh bara chhawmdawlna tur a ni tih sawiin, “Kan State thenawm Tripura, Arunachal Pradesh, Assam leh hmun dangah te chuan Central sawrkar atanga a thlawna buhfai state ten an dawn bak hi chu an sem meuh lo a. Mizoram-ah chuan mipui harsatna hrethiamin sawrkarin ama senso in Ration Card Vär hmangin mipui nawlpui hnenah retailer kaltlangin buhfai man tlawm zawka leina remchang a siam thin a ni,” an ti a. Hun lo inher zelah Ration Card Var hmang chhungkaw tam takin Ration buhfai an la lo chungin Ration Card neih an duh a. Chu chu sawrkarin lo ngai pawimawhin leh mi tam takin an Ration Card neih mek chu sawrkara surrender an duh tih hriain ration buhfai lakna tur ni lo, chhungkaw member tihchianna atana document pawimawh tak ni si ‘Not Entitled for Ration’ (NER) Card chu kum 2019 atang khan sawrkarin a siam chhuak ta niin an sawi a. Ration card hi thil pawimawh hrang hrang tih nana document pawimawh a nih avangin hman tulna a awm thin a. Hetiang mite tan liau liau hian sawrkarin a kalpui mêk niin FCS&CA chuan an sawi bawk.

Comments

Popular News (Last 30 Days)

LPG man bithliah thar