Organic Farmer te sum lakluh pun vangin PM in a fak

Prime Minister Narendra Modi chuan Mizo Organic Farmer te sum lakluh a let sarih-a a tih pun avangin a fak.

Prime Minister hian tunhnaia Video Conferencing hmanga Viksit Bharat Sankalp Yatra beneficiary te a kawmna ah he thu hi a sawi a, kum 2017 atanga Organic Farming bul tan tawh Aizawl Durtlang a cheng VL. Hruaia Ralte chuan Prime Minister hnenah hian Sawhthing, Zo Hmarcha leh a thlai thar dang te chu company hrang hrang New Delhi leh a aia hla ah te a hralh chhuak thin tih a hrilh a, hei vang hian a sum lakluh pawh nasa takin a pun phah tih sawiin, Rs. 20,000/- la lut thin khan Rs. 1,50,000 a la lut tawh tih a sawi a ni.

Prime Minister in a thlai thar a hralhchhuah dan chungchang a zawhna chhang in VL. Hruaia Ralte chuan hmarchhak state huamchhung a kut hnathawktute harsatna nei loa an thlai thar an hralhchhuah theih nan Mission Organic Value Chain Development an siam chu a tangkai hle tih a sawi a. Prime Minister chuan ramchhunga Organic Farming uar thar a ni chu lawmawm atih thu sawiin, Organic Farmer VL Hruaia Ralte bakah hmarchhak State hrang hrang te leh ram hla tak atanga hlawhtlinna chang thei te chu an fakawm hle tih a sawi a, Organic Farming lama sulsutu an ni tih a sawi bawk.