Best Lifter-a thlan Chief Minister in a lawmpui

Chief Minister Lalduhoma chuan Senior National Weightlifting Championships neih zawh taka Best Lifter atana thlan Jeremy Lalrinnunga chu nimin khan a chenna In-ah lawmpuina thingpui a inpui.

Chief Minister Lalduhoma chuan Mizo thalai la naupang tak, infiamna lama khawvel hmelhriat kan nei chu lawmawm a tih thu sawiin, Mizoram leh India ti hming thatu ni tura bei chhunzawm zel tura chahin lawmpuina leh duhsakna a hlan a. Jeremy Lalrinnunga hian inelna lian tham lo awm tur atana inbuatsaihna a neih mek dan te leh hlawhtlinna a lo chan tawhte Chief Minister hi a hrilh bawk a ni.

December 28, 2023 atanga January 7, 2024 chhung khan Indian Weightlifting Federation, Youth, Junior leh Senior National Weightlifting Championships chu Itanagar (Arunachal Pradesh)-ah neih a ni a, Senior National Weightlifting Championships-ah hian Mipa huang-ah a tum hnihna atan Best Lifter atan Jeremy Lalrinnunga hi thlan a ni a. Kum 2020-a Senior National Championship Kolkata (WestBengal)-a neih ah khan Best Lifter-ah hian thlan ni tawh bawkin Senior National Weightlifting Championships-ah Vawi thum Gold a lakna a ni a. Youth Olympic Gold Medalist a lo ni tawh bawk a ni.

Nimin-a Chief Minister in lawmpuina thingpui a inpuina ah hian Jeremy Lalrinnunga hi a pa Lalneihtluanga leh Mizoram Weightlifting Association hruaituten an tawiawm a. Chief Minister hi I&PR Minister Dr. Vanlalthlana chuan a tawiawm bawk a ni.