NIT Convocation neih tur MZP in dodal tum

Mizo Zirlai Pawl (MZP) General Hqrs. chuan niminpiah khan Emergency Meeting neiin NIT Mizoram hna lak dan diklo chungchanga an hmalakna te an thlirho a. NIT-a thawk tur Asst. Registrar hna lakna ah induhsakna uchuak tak leh thil fel lo tam tak a awm tih tarlangin, a rang thei ang bera hna lak chu sut turin NIT thuneitute an phut a. Mizo zirlaite leh lehkha thiam thalai hna zawng mekte inkarah inelna thianghlim a awm zel theih nan NIT Mizorama hna lak dan fel lo tak chu sut thuai a nih loh chuan naktuk-a NIT Mizoram-in Convocation neih a tum chu an dodal tur thu an sawi a. Hemi chungchangah hian Ministry of Education-ah lehkha thawn nise an ti bawk.

MZP hian Myanmar leh Mizoram inkar-a zalen taka inkalpawh theihna, Free Movement Regime tunhnaia hlih tumna leh Zofate inkarah indaidanna bang hung tumna awm chu tha an tih loh thu leh he hmalakna hi a tawp thleng dodal an tum thu an puang a. Hemi chungchanga Chief Minister Lalduhoma hmalakna chu MZP chuan lawmawm a tiin, a thlawp tlat tih an sawi a, hemi chungchanga hmalakna hi sut leh a nih theih nan Prime Minister leh Union Home Minister hnenah Memorandum thehluh ni se an ti bawk.