MNF President Zoramthanga’n Sr. Vice President nen an tel lovin Party kal tawh se tha an tih thu a sawi

MNF Party President Zoramthanga chuan an Party President nihna chelh zui a tum tawh loh thu nimin khan puangin an Party Senior Vice President Tawnluia nen an sawidun hnuah an tel lovin Party chu kal tawh se tha an tih thu a sawi.

MNF Party hian nimin khan Aizawl-a an Party Office, Mizo Hnam Run hawnna hun hmangin he hunah hian an Party President Zoramthanga chuan Party-a a nihna chungchang hi sawiin, “Pu Tawnluia nen kan sawi dun a, kum 80 chunglam ve ve kan lo ni tawh a, keini tel lovin kal tawh se kan ti a ni,” a ti a. An Party tan theihtawp an chhuah zel dawn tih pawh sawiin, “Hotute pawh kan hrilh tawh a, hotuten remruatna an la rawn nei mai ang,” a ti a. MNF hruaitute ni lai term a tawp tawh thu sawiin, “Hotute hnenah keini chu min ngaihtuah tel tawh suh u kan ti a ni,” a ti bawk.

MNF Sr. Vice President Tawnluia kaihhruai he hunah hian MNF lungphum chu ‘Pathian leh kan ram tan’ tih a nih thu MNF President chuan sawiin, “He thuthlung in a man a pek tawh hi a tam em em a. Khawkhawm, hmeithai, fahrah leh martar thisen tam tak a luang a ni. Party tam tak a lo dingchhuak tawh a, an ral leh thin a, MNF erawh chu kum 63 chhung Pathian in a hruai tawh a. Kum 63 chuang Pathian leh kan ram tana kal tawh kan nih kha, inthlan vawi khat vang maiin kan nghing tur a ni lo,” tiin MNF mipuite a chah a. “Tun dinhmunah pawh hian MNF hi Party ruhrel nei tha ber kan la ni a. Chu chu Pu Laldenga emaw, Pu Zoramthanga vang emaw ni lovin Pathian leh kan ram tan, kan tih tlat vang a ni,” a ti bawk.

Tuna MNF Party General Hqrs. hruaitute term hi nikum khan a tawp a, State Assembly inthlan an hmachhawn avangin inthlang tha lovin hruaitu ngai kaihhruaiin an kal chho a, kuminah hian inthlang thar tur niin, an inthlan hun tur erawh puan a la ni lo a ni.

MNF Sr. Vice President hian a chawlh tur thu a puang ve lo naa President Zoramthanga chuan chawlh an duh dun thu hi nimin khan a puang a, amaherawhchu hemi chungchang hi MNF Party Committee sang hrang hrang, Political Affairs Committee, Core Committee emaw National Council emaw ten an rel leh tur ni a ngaih a ni a, anni hian an party hruaitu tur chungchang hi an ngaihtuah rin a ni.

Thudawn danin MNF Party ah hian an President thlak turin hming pathum a lang tam ber a, MLA nilai Lalchhandama Ralte bakah Lalruatkima leh Dr. R. Lalthangliana te chu hming langsar an ni.