Armed Forces Veteran Day leh Re-Union CM in hmanpui

Chief Minister Lalduhoma chuan nimin khan 8th Armed Forces Veteran Day lawmna leh Mizoram Ex-Servicemen Re-Union hmanpuiin Mizoram sawrkara hna hauhsak bik (job reservation) an neih te chu an chanpual ah lo dah turin a hrilh.

Sainik Welfare & Resettlement, Mizoram bultuma Aizawl Lammual-a he hun hmanna ah hian Chief Minister chuan khawi ram mai pawh an history en chuan ram emaw, hnam anga an lo dinchhuahna bulah hian indona in hmun pawimawh a lo khuar deuh zel tih a sawi a. Chutiang indona a lo awm apianga eng ram pawhin an hmachhuan leh an hmanraw neih hlu ber chu sipaite an ni tih sawiin, “Sipaiten ram leh hnam chhan turin, an nunna pawh chan dawn se pawi ti phal lovin an bei a, hnehtu an nih chuan mipuiten 'ram' kan lo nei ta thin a ni,” a ti a. India ramin kum 77 chhunga khawvela ram ropui ber te zinga mi ni theia a inhlankaina kawngah sipaite hian an thawh nasa em em thu sawiin, Sipai te pawimawhna te a tarlang bawk.

Chief Minister Lalduhoma chuan Sipai te chu an phu ang ngeiin Central sawrkar pawhin a ngaihsak tih sawiin, “Pension a hun takah in la a, Free Medical Treatment in dawng thei a, ECHS (Ex-servicemen Contributory Health Scheme) huang chhungah ZMC (Zoram Medical College) hman theih a lo ni ta bawk a. Vawiin hian Mizoram State Cancer Institute nen inremna thuthlung pawh intan ziah a ni dawn niin ka lo hre leh zel a, a lawmawm hle,” a ti a. “Mizoram sawrkara hna hauhsak bik (job reservation) in neih te chu in chanpual ah lo dah ula, harsatna in neih chuan ka hnenah in rawn thlen dawn nia,” a ti a. Mizo thalai tam zawk sipaiah lut thei se a duh thu a sawi bakah lawmman dawngtu mi 9 te hnenah lawmman a hlan bawk a ni.

Nimin-a he hun hmanna ah hian SW&R Director Surg. Lt. Cdr. Lalnuntluanga (Retd) chuan inlawmna thu sawiin Veteran Day ni tak hi niminpiah kha a ni a, an Chief Patron, Mizoram Governor ni bawkin nimin-a a lawmna neih a remtihsak avang lawmthu a sawi bawk a. He hunah hian Lt. Col. ZS Zuala (Retd), Sr. Vice President, Mizoram Ex-Service Leaque pawhin thusawiin, tun sawrkar tharah an member pahnih Lt. Col. Clement Lalhmingthanga (Retd) leh TBC. Lalvenchhunga, Petty Officer (EM) te an tel mek a, sipai bang, MLA a tling hi Mizoram in kan nei nual tawh a, kan chhuang thin hle a ni, a ti.

Arm Forces Veteran Day hi kum 1947 chhova India independent hlim chhawn indo laia Field Marshall KM Cariappa, OBE, India mi dik tak (native Indian) Commander-in - Chief of Indian Army ni thei hmasa ber, chumi pension ni champhaah hman a ni a, a ni tak chu nimin ni 14 zawk kha a ni.