Central in sum a pekchhuah loh avangin MGNREGS hnuaia inhlawhna sum ala lut lo

Mizoram sawrkar-a Rural Development Department chuan MGNREGA hnuaia mipui inhlawhna sum chu Central in a la release loh avangin Job Card Holders te account-ah la lut lo a awm nual tih an sawi.

Hemi chungchanga thuchhuah an siam ah RD Department chuan MGNREG Act leh Operational Guideline angin MGNREGS hnuaia thingtlang mipuite inhlawhna (Wage) chu Mizoram-ah pawh thlatin tluang taka kalpui thin a nih thu leh tunhnaiah thingtlang mipuite inhlawhna Central in a la release loh avangin Job Card holders te account-ah la lut lo a awm nual tih hriat a ni tih an sawi a. MGNREGS hnuaia thingtlang mipuite inhlawhna, Wage Payment hi Central Sawrkar duhdan leh ruahmanna angin online leh Electronic payment vekin NeFMS hmangin kalpui a ni tih sawiin, mipuite inhlawhna mil zelin Software- NREGASoft hmangin FTO (Fund Transfer Order) te MIS ah siam zel a ni a. Heng FTO hmang hian Central Sawrkar chuan hnathawktu te/Job Card neitute Bank Account-ah direct-in inhlawhna pawisa a rawn thun thin tih an sawi.

MGNREGS hnuaia inhlawhna Wages bik hi Central Sawrkar atanga 100% direct funding a nih thu pawh sawin, Wage payment hi Mizoram Sawrkar Finance Department kaltlang lovin, Job Card Holder te Account-ah Direct Benefit Transfer (DBT) hmangin Central Sawrkar-in a rawn thun (credit) thin thu leh mipuite inhlawhna ang zelin Rural Development Department chuan FTO hi MIS-ah District leh Block tina thawktute kaltlangin a siam (generate) sak nghal zel thu an sawi a. Tun dinhmunah, Mizoram Sawrkarin tih khawtlai (pending) engmah a nei lo nia sawiin, Central Sawrkar-ah a rang lama mipuite inhlawhna release thuai turin a dil mek thu leh Central Sawrkar pawhin a tahtawlin mipui inhlawhna leiba (liability) te hi a rawn tihfel leh thuai beisei mek a nih thu an sawi a. Hemi chungchangah hian Mizoram Sawrkar chuan hma a lak mek thu sawiin, Central Sawrkarin an rawn release hunah an inhlawhna pawisa te pawh Job Card holders te account-ah theuh a luh leh nghal dawn avangin thingtlang mipuite lo chiai lo tur leh dawhthei taka lo nghak hram hram turin an ngen a ni.