MLA tana Training buatsaih kharna hunah CM in Legislator te tan thawhrim a tul thu a sawi

Mizoram Legislative Assembly Member te tana ni thum awh Leadership Innovations Training chu nimin khan zawhfel niin he Training kharna hun hi Chief Minister Lalduhoma chuan a hmanpui a, Legislator te tan thawhrim leh zir peih a tul thu a sawi bawk.

Assembly Secretariat leh Administrative Training Institute (ATI) te tangkawpin an buatsaih he Training kharna hun Assembly Secretariat Conference Hall-a neih ah hian Chief Minister Lalduhoma chuan Mizoram in ATI changtlung tak a nei leh Mizo Resource Person thiam leh tha tak tak a nei chu lawmawm a tih thu a sawi a. He Training hi karleh lamah Delhi-ah chhunzawm a ni dawn tih sawiin, “Training min buatsaihsak chhan hi thil dang atan nilovin Legislator tha kan nih theih nan a ni a, kan ram a ni. A zir zui peih leh peih lo te kan inthlau thei viau pawhin a rinawm,” a ti a. Tunlai khawvel-ah Technology a san tawh avangin tunlai thil thar ber ber an manphak a ngai tih pawh sawiin, chutiang tura an inbuatsaih zel a tul thu a sawi a. Tun hma atanga Legislator tha nih tuma a lo beih tawh dan te sawiin, kum tam tak chhung sawrkar department te a zir reng thu leh Vawiin thlenga file a la pending ngai loh thu a sawi a, “File ka ngah leh zan ka mengrei a ni mai a, file chinfel loh nei chungin ka mutui thei lo,” tiin Legislator tana thawhrim a pawimawhna te, zir peih a tulzia te leh thil thlir thiam a hlutzia te a sawi bawk a ni.

Nimin-a Training kharna hun hi Chief Secretary Dr. Renu Sharma chuan kaihruaiin Trainee te aiawhin Home Minister K. Sapdanga chuan, “Kan training hian Legislator ni tura hriattur lo tam zia te min hriattir a, kan hlawk hle a ni,” a ti a. Training buatsaih saktu leh Resource Person te chungah lawmthu sawiin, karleh lama Delhi a Training buatsaih turah pawh tel theuh an tum thu a sawi bawk.

He hunah hian Mizoram Assembly Speaker Lalbiakzama chuan Training kharna thu sawiin, hetiang Training buatsaihtu ATI Director Maria CT. Zuali leh a thawhpuite inbuatsaihna leh Resource Person te inbuatsaihna chu tha a tih thu a sawi bawk a ni.