Infiammi leh Sports Assn. ngai pawimawh dawn

Sports Minister Lalnghinglova Hmar chuan Sports lama an ngaih pawimawh hmasak tur chu a infiammite leh a enkawltu Sports Association te an nih thu a sawi.

Nimin zing-a Mizoram State Sports Council (MSSC) hnuaia Sport Association hrang hrangte enkawl hmunhma a tlawhna ah Sports Minister leh MSSC President ni bawk Lalnghinglova Hmar chuan Sports lama an ngaih pawimawh hmasak tur chu a infiammite leh a enkawltu Sports Association a nih thu sawiin, hei vang hian Sports Association hmunhma MSSC hnuaia awmte pawh tlawh a nih thu a sawi a. Sports Association hruaitute nen a taka an inkawm thei leh a hmun ngeia an mamwhte a hmuhpui thei chu lawmawm a tih thu sawiin, an harsatna thlen ah theihtawp chhuahpui an tum tur thu a sawi bawk.

Sports Minister chuan Medal la thei tura inchher an tum dawn thu pawh sawiin, chulam hawi chuan ke pen zel an tum thu a sawi a, “Kan hmunhma neih ang angte hi a tha tawk lo a nih pawhin hmang tangkai ila, dim leh duat takin i enkawl ang u,” a ti bawk.

Mizoram State Sports Council-in a enkawl, Ramhlun Sports Complex tia hriatah hian Sports Association hrang hrang, Boxing, Volleyball, Bassketball, Football, Wrestling, Body Building, Weightlifting, Tenis te an awm a. Nimin zing-a heng hmun a tlawhna ah hian Minister hi MSSC Secretary John Tanpuia chuan tawiawmin Sport Association hrang hrang hruaitute chuan Sport Minister hi an lo dawngsawng a, anmahni hmun ngeiah an mamawhte lo sawipuiin, Sports hmunhma tihchangtlun dan tur hrang hrangte an sawiho nghal bawk.