Mizoram sawrkar in Boundary Committee din thar

Mizoram Sawrkar chuan ramri chungchang ngaihtuahtu tur Boundary Committee chu Home Minister K. Sapdanga kaihhruaina hnuaiah a din thar ta.

Kumin January 3-a sawrkar in thuchhuah siama a tarlan danin Boundary Committee-ah hian Chairman-ah Home Minister bakah Vice Chairman-ah Environment Forest & Climate Change Minister leh Member Secretary-ah Home Secretary ruat an ni a. Member-te chu Adviser to CM (Political) Lalmuanpuia Punte, Chief Secretary, DGP Mizoram, Govt. T Romana College Assistant Professor Joseph K. Lalfakzuala, Political Party (MNF, INC, BJP, AAP leh ZPM) aiawh pakhat theuh, NGO (NGOCC, YMA, MUP, MHIP, MZP leh MSU) aiawh pakhat theuh leh JAC on Inner Line Forest Reserved Demand, Mizoram aiawh pakhat an ni a. Heng bakah hian Chairman-in a duh chuan Committee-ah a duhzawng a sawm thei dawn bawk a ni.