Central YMA hruaitu ten Chief Minister an kawm

Central YMA hruaitute chuan nimin khan Chief Minister Lalduhoma chu kawmin kawng hrang hranga an thil ngaih pawimawh te an sawipui.

Chief Minister Pisa-a Central YMA Office Bearers te nen an inkawmna ah hian Central YMA hruaitute chuan Chief Minister hi an lawmpui thu an hrilh a, sawrkar tharah rinna an nghah thu leh a tul ang zela sawrkar nena thawhho an inhuam thu an sawi bawk a ni. He hunah hian Central YMA hruaitute hi an President Lalhmachhuana hova telin Environmental Clearance chungchang te, Assam Rifle ram chhunga pass neitute chungchang te, ruihhlo lo tam ta lutuk do dan tur tha nia an hriat te, Kuhva ro tawlh chungchang te, Free Movement Regime chungchang te, Manipur atanga sahimna zawnga lo lut Zohnahthlakte chungchang te leh Chapchar Kut lo thleng tur chungchanga YMA ngaihdan te bakah thil pawimawh dang te an sawiho a ni.

Aizawl Law College-a Student Bar Council hruaitute pawhin Chief Minister Lalduhoma hi a Pisa-ah hmu bawkin an harsatna te an thlen a, Student Bar Council hruaitute hian Bar Enrollment Centre chungchang te, LL.M zir theihna hmun neih ve chungchang te, an College Campus thar chungchang te, Separate High Court chungchang leh thil pawimawh dangte an thlen a. Chief Minister hian an zirlaite tha taka kalpuia, ram tana chhenfakawm, India ram hmun danga pawha zahpuiawm loh khawpa rintlak nih tum turin a lo fuih a. A hnena an harsatna thlen hrang hrang te chu document fel tak nena thlen tha leh tura hrilhin, Ram mamawh thil tangkai tak tak te a nih avangin theihtawp chhuahin a lo umzui tur thu a sawi a ni.

All Mizoram Elected Women Representatives hruaitute pawhin nimin khan Chief Minister hi a Pisa-ah kawmin lawmpuina an hlan a, Mizoram-a a hmasa ber ni tura Cabinet Minister-a Lalrinpuii a dah avanga lawmthu sawiin, tuna MLA ni mek Lalrinpuii leh Baryl Vanneihsangi te an pawl-ah tha takin an inhmang a, an tangkaipui hle tih an sawi a. Chief Minister chuan Mizorama hmeichhiate venhimna lam thil pawimawh te sawiin, an pawl kal zelna turah duhsakna a hlan bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man