Mizoram MLA thar te New Delhi-ah training

Mizoram atanga Member of Legislative Assembly (MLA) tling tharte tan nimin khan Parliamentary Research and Training Institute for Democracies (PRIDE) buatsaihin New Delhi-a Parliament Building-ah 'Orientation for Newly Elected Members of Mizoram Legislative Assembly' tih thupui hmangin Training neih tan a ni a, he Training-ah hian Mizoram-a MLA thlan thar mi 23 an tel a ni.

Nimin-a Training hawnna hunah hian Mizoram Assembly Speaker Lalbiakzama chuan Mizoram sawrkar chuan mipui nena kalrual leh sawrkar meng kar nih a tum thu sawiin, Mizoram chuan chhuan tur nei lo mah se State ralmuang ber a nihnate, harsatna leh buaina avanga thenawm ram Myanmar leh  Bangladesh bakah State thenawm Manipur atanga sahimna zawnga pantute duat taka tuamhlawm an ni chu thil chhinchhiah tlak tak a nih thu a sawi a. Mizoram atanga MLA kalte chuan beiseina sang tak nen ram rorelna sanga an thil zirchhuahte tangkai taka hman an tum thu a sawi bakah Mizoram tana thil tha leh thil thar zirchhuak tura an tuihal thu a sawi a. MLA te chu training hming pu a hun hmang ral satliah mai lova hman tangkai tuma ngaihtuahna seng tura chahin, theihtawp chhuah tura beisei an nih thu a sawi bawk.

Heng MLA thar te hian niminpiah khan New Delhi hi thlengin Training hi tunkar Ningani thleng neih tura ruahman a ni a, an zingah hian Speaker Lalbiakzama, Home Minister K. Sapdanga, Agriculture Minister PC Vanlalruata, Health Minister Lalrinpuii leh Deputy Speaker Lalfamkima bakah Minister of State pali zinga pathum pawh an tel a ni.