Chief Minister in Champhai-a Grape chingtute kawm

Chief MinisterLalduhoma chuan nimin khan a Pisa-ah Champhai Grape Growers Society hruaitute kawmin an harsatna thlen hrang hrangte a ngaihthlak sak.

Chief Minister chuan Champhai Grape Growers Society hruaitute chu an hmunhma te a lo tlawh fo tawh avangin harsatnate a hriatthiampui tih a hrilh a, “In thlaitharte tha taka in hralh theih nan sawrkarin tih theih a neih te chu a indawtin tih chhoh zel kan tum dawn a. Tunah erawh chuan sawrkar thar kan kalpui tan chauh a ni a, sum leh pai lama intiamna ang chi chu engmah kan tithei rih lo. Inpuih theih hun erawh chu a la awm em em ang, chu hun chu i nghak hram hram ang u,” tiin “Kan sawi fo thin angin kum khat tal insawhngheh nana hman kan mamawh a ni,” a ti bawk.

Champhai Grape Growers Society hruaitute hian an Society tana Chief Minister-in hma a lo laksak tawh te an hriatreng thu he an inkawmna ah hian sawiin, lawmthu an hrilh a. An harsatna hrang hrang te chu ziakin an thlen nghal a ni.