MZP in Aizawl-a an Office hawngin Rajya Sabha MP hnenah chawimawina an hlan

Mizo Zirlai Pawl (MZP) General Hqrs. chuan kumin (2024) atan Aizawl-a an Office, MZP Pisa Pui hawnna hun nimin khan an hmang a, ram leh hnam tana a thawh that avanga Mizoram Rajya Sabha MP K. Vanlalvena chunga lawmthu sawina hun MZP Conference Hall-ah an nei nghal bawk.

MZP General Hqrs. Vice President C. Lalremruata kaihhruaia he hun hman ah hian MZP President H. Lalthianghlima chuan Hunpui avanga hun engemaw chen MZP Pisapui khar a nih hnuah kum 2024 atan hawn leh a ni ta tih sawiin, Zirlaite leh ram leh hnam tan a tul apianga hmala turin Pisapui chu hawn a nih thu a sawi a ni. MZP President chuan Mizoram chhunga hmasawnna hnathawh hrang hrang leh zirna tih hmasawn nana hmalakna hrang hrangte uluk takin an vil zui dawn tih sawiin, “Zirtirtu mahni post-a awmlo te, an post-a an awm theih nan hma kan la dawn a ni,” a ti bawk. MZP President chuan Ram leh hnam tana huaisen taka ding ngam Mizoram Rajya Sabha MP K. Vanlalvena chuan chawimawi a phu takzet tih sawiin, “A hnathawh hrang hrangte avangin MZP ten lawmthu sawina a hlan a ni,” a ti a. Mizoram-in Technical zirna In kan neih hlu ber NIT Mizoram-ah thil fel tawklo a awm avangin Vawiin-a Convocation an neih tur chu dodal a ni dawn tih a sawi bawk.

MZP hian Rajya Sabha MP K. Vanlalvena chu Mizo hnam chhan nana India Parliament-ah vawi duailo au chhuak a, ram leh hnam tana theihtawp chhuaha hma a lo lak tawhna avangin lawmthu sawina thuziak leh Tawlhloh puan he hunah hian hlanin Network for Unity Association Mizoram leh Mizoram - Myanmar Coordination Committee te pawhin MP hnenah hian chawimawina thilpek an hlan bawk.

Rajya Sabha MP K. Vanlalvena chuan MZP-ten a hnathawh avanga lawmthu sawina an hlan chu lawmawm a tih thu a sawi a. Mizoram leh Chin State Zofate zalen taka inkalpawhna Free Movement Regime (FMR) tunhnaia hlih tumna a awm chu a pawm loh thu sawiin, Parliament Session hmasa berah pawh sawichhuah ngei a tum thu a sawi a. “British-in Zofate min the darh a, a pawi kan tih em em laiin tunhnaiah kan inkalpawhna ber chu hung tum a ni leh ta a. India hian ramri hung a duh a nih chuan Mizoram leh Chin State inkar ni lovin, China leh Pakistan ramri hung mai rawh se,” tiin, “A tawp thlengin kan dodal zel ang,” a ti bawk.