LADC hnuaia Education sum tih chingpen thu ah Special Court in mi engemaw zat thiamloh a chantir

Lai Autonomous District Council (LADC)-a Education Department hna lak leh thawktu hlawh tur Rs. 1,33,56,884/- tih chingpen chungchang leh hemi kaihhnawih ah hian khatihlaia Education changtu Executive Member V. Zirsanga leh mi 33 te chu thiamloh chantir an ni a. Karleh Thawhtanni-ah hremna tur puan a ni ang.

Prevention of Corruption Act Special Judge Dr. HTC. Lalrinchhanga Court chuan nimin khan he thubuai ah hian thutlukna a puang a, Court thutlukna in a tarlan danin kum 2013 khan LADC-ah Work Education zirtirtu mi 41 te April leh May thla hlawh chu LADC in pe tawh anga insawiin LADC EM, kum 2013-a Education changtu EM,  V. Zirsanga leh a thurualpui mi 5-te'n thuneitute bumin Lawngtlai Treasury Office atangin Rs. 1,33,56,884/- an la chhuak a. He pawisa hi insemin  V. Zirsanga chu cheng nuai 21 eiru a puh a ni a. Lawngtlai Sub-Hqrs. Middle School Teachers Association President leh khatih laia  Thingkah Middle School HeadmasterNC. Muankima chu he thilah hian a meizanghlaptu berah puh niin cheng nuai 3 eiru-a puh a ni bawk a. Anni bakah hian Mizoram sawrkar hnuaia Lawngtlai-a DEO hna chelhtu Lalduna Chinzah chu Rs. 73,37,220/- eiru a puh a ni a, DEO Lawngtlai Pisa a thawk Ramengzauva chu cheng nuai 30 eiru a puh niin NC. Muankima leh Lawngtlai Sub-Hqrs. Middle School Teachers Association-a Secretary C. Lalchawiliana te chuan cheng nuai 50 chu Lalduna Chinzah hnen atangin June Ni 27, 2013 khan la chhuak in, heta tang hian lo eiru a puh a ni bawk.

Heng bakah hian Zirtirtu leh thawktu dang  mi 31 te chu thiamna lama tul lehkha lem hmanga dik lo taka lut a puh an ni a, a tlangpuiin kum 1992 vela lo thawk tawh angin an Service Cook lem an siam bakah hetih hunlai vela hna atana lakna lehkha lem neih chungchangah thiamloh chantir an ni bawk a. He thubuai ngaihtuah a nih lai hian thubuai nei thenkhat te chu an boral hman thung a ni.

Court chuan thubuai kaihhnawiha ACB in pawisa an man Rs. 28,93,750/- chu sawrkar sum bawm a chhung lut nghal turin a hriattir a. Heng mi Court in thiamloh a chantir tak te hremna tur hi Court chuan karleh Thawhtanni, January 22, 2023 khian a puang dawn a ni.