Kangmei Ven Hapta hman dan tur ruahman

State Level Sub-Committee on Fire Prevention Committee chu nimin khan Forest Minister Lalthansanga kaihhruaiin SAD Conference Hall-ah an thukhawm a, kumin chhunga kangmei ven Hapta hman dan tur leh kumin Thal chhova hmalak dan tur hrang hrangte rel a ni.

He Meeting hian Kangmei Ven Hapta chu February 5 atanga Feb. 9, 2024 chhunga hman nise tiin a hawnna chu February ni 5, 2024 (Thawhtanni) ah Aizawl Vanapa Hall-ah hman nise an ti a. He Hapta chhung hian kangmei venna kawnga inzirtirna uar zawk a neih nih se an tih bakah Inzirtirna thehdarh nan Print Media bakah Electronic Media te hman ni se tih a ni a, Sawrkar Office leh zirna In-ah Kangmei Ven Hapta thutiam lak (pledge taking) neih vek ni se tih rawt a ni bawk.

Kumin hian Lo leh huan, Ram hal tur te chuan March ni 15, 2024 hma ngei a hal tur a nih thu leh Hmunphiah hmun nei te erawh March ni 31 thleng hun pek an ni ang tih a rel a. Lengpui Airport leh a chhehvel khua te tan tlai lam dar 3:30 hnu lamah ram a hal tan thei dawn thung a ni. Kumin hian kum danga an lo tih tawh thin angin kangmei ven kawnga thawk tha District leh Village Level-ah lawmman siam leh a ni ang.

Nimin-a thutkhawm ah hian EF&CC Department-a Principal Chief Conservator of Forests, Kamal Preet-i chuan inlawmna thu sawiin, Mizoram hi kangmei chhuah awlsamna ber pawl a nih avangin hmalak nasat a ngaihthu a sawi bawk a ni.