Inthlanpui kaihhnawiha mipui zirtirna chhuah tha chanchinbu te lawmman hlan an ni

Mizoram Assembly Inthlanpui 2023 denchhena ni tin chhuak Chanchinbu zinga mipui hnena Election chungchang leh vote thlak tura inzirtirna lam hawi kalpui tha thlanchhuahte hnena lawmman semna chu nimin khan neih a ni.

Mizoram CEO Office-a Media Cell Nodal Officer leh Addl. CEO Dr. H. Lianzela Pisa-a he hun hman ah hian Addl. CEO chuan General Election to Mizoram Legislative Assembly, 2023 kalpui chhunga mipui zirtirna pek kawnga media kaltlanga hmalakna chak zawk a awm theih nana intihsiakna buatsaih a nih thu sawiin, tehfung hrang hrang siamte zulzuia endikna kalpui a nih thu a sawi a. Media-te chu democracy khaidingtu leh vawnghimtu pawimawh tak 'Fourth pillar of democracy' an nih thu sawiin, “An pawimawhna ECI in a hmuh hmaih lova, hmalakna pawimawh ah te a telh zel thin a ni,” a ti a. Inthlan kaihhnawih thuchhuah leh inkaihhruaina siamte tha taka Media-te'n an zawm thin leh thuneitute thu an ngaichang thin chu fakawm a tih thu a sawi bawk.

Addl. CEO chuan Media-te chu thil chik leh zirchiang peih mi nih tum tur leh tunlai thiamna mil zela intuaithar peih mi nih tum turin a chah a. Khawvel changkang zel kentel thiamna mila insiamrem thiam tur leh chanchin thar thehdarh kawngah pawh tunlai thiamna chhawr tangkaia Digital Technology nena kalkawp thiam tum turin a fuih a. Inthlanna felfai, dik leh langtlang hlawhtling taka buatsaih a nih theih nana thahnemngai taka thawktute inpekna fakawm a tih thu a sawi a. Kan hma lawka neih tur Lok Sabha Election 2024-ah thawhhona tha zawk neih leh ngei a nih theih nan Chanchinbumite tawiawmna a ngen nghal bawk.

Nimin-a lawmman semna hun hi Dr. Lallawmkima, IPRO Media Cell chuan kaihruaiin tehfung hrang hrang hmanga endikna kalpui a nih dan a sawifiah a, Intihsiakna hi October ni 26, 2023 atanga November ni 6, 2023 chhung khan neih niin, tehfung hrang hrang (Frequency, Editorial, Headline & First page top corner slogan) hmangin endik a ni a, November ni 15, 2023 khan result puan niin lawmman hian Citation bakah pakhatna in pawisafai Rs. 30,000/-, pahnihna in Rs. 20,000/- leh pathumna in Rs. 10,000/- a kengtel a. Virthli, Aizawl ( Editor - K. Zothankhuma) chuan lawmman pakhatna dawngin Lenrual, Champhai (Editor - Lalhlupuia) chuan lawmman pahnihna a dawng a, Zothlifim, Serchhip (Editor - C. Lalrochhuanga) chuan lawmman pathumna a dawng bawk a ni. Nimin-a he hun hmanna ah hian MJA General Hqrs. Treasurer C. Lalhma-chhuana pawhin thu a sawi bakah lawmman dawngtute hian thu an sawi bawk a ni.