Home Minister in YMA chu sawrkar tha tichaktu leh kut ke tangkai ni zel tura a duh thu a sawi

Home Minister K. Sapdanga chuan YMA chu khawtlang muanawm leh him a awm theihna tura sawrkar tha tichaktu, kut ke tangkai ni zel tura a duh thu a sawi.

Kumin atana Central YMA Executive Committee (CEC) thutkhawm hmasa ber nizan hmasa a Central YMA Committee Room-a neih a hmanpuina ah Home Minister K. Sapdanga chuan YMA chu hun tam tak a hmanralna, inti neitu taka a lo awm ve tawhna a ni tih sawiin, YMA chu khawtlang muanawm leh him a awm theihna tura sawrkar tha tichaktu, kut ke tangkai a lo ni tawh thin tih a sawi a, chutiang ni chhunzawm zel tur chuan a duh thu a sawi a. Hun kal tawh thlirin hna khirhkhan zual han thawh tak tak chuan sawrkar chet dan an duhkhawp lo fo thin tih sawiin, sawrkar lam pawhin YMA te hmathehin, engemaw chang phei chuan an papek hial a, dan leh hrai kenkawh lamah phei chuan YMA ten Legal sanction an neih bawk si loh avangin khawtlang tana tlawmngaia thawktute zawk chuan mipui dem an hlawh lek lek thin niin a sawi a, a thawkchhuaka te hah zia leh inpekna san thin zia hrechiangtu tan rilru natna tam tak a awm thin tih a sawi bawk.

Home Minister chuan sawrkara mawhphurhna a chan chung chuan mipuiin dan leh hrai kenkawh kawnga sawrkar an rin ngam lehzual theihna tura thawh a duh thu sawiin, an hmachhawp te ti hlawhtling turin YMA tawiawmna leh finchhuahna an mamawh tih a sawi a, mipuite leh tlawmngai pawl te chu sawrkar tha tak an siam theih nan thawhho puiah a sawm bawk a. Sawrkarin a tih awm tak leh mawhphurhna a lak ngeina tur thil tam tak a awm a, chutih rualin, khawtlang tana thawh ngai tam takah hian sawrkar tha chakna ngawt chu a tawk lo hle tih hrechiangtu vek an ni tih a sawiin, “Chutiang anih pawhin, thawhhona tha kan neih theih nan kan inrawn tlang ang a, kan relho zel ang a, ram leh khawtlang tan tum thuhmun nei kan ni a, chumi tihlawhtling tur chuan lungrual taka thawhhopuiah ka sawm nawn leh che u a ni,” a ti bawk.

Nizan hmasa a CEC thutkhawm hi Central YMA President Lalhmachhuana chuan kaihruaiin Central YMA President hlui R. Langheta chuan Central YMA hmingin Home Minister K. Sapdanga hi Mizo Iptechei a hlan bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar