FMR tihtawp a rin loh thu Adviser to CM in sawi

Adiviser to Chief Minister (Political) Lalmuanpuia Punte chuan Myanmar a cheng Zofate nena passport leh visa ngai lova inkalpawh theihna chu sawrkar laipui-in a tihtawp mai a rin loh thu a sawi.

Thuthar thehdarhtu thenkhat ten an kawmna ah Adviser to Chief Minister (Political) Lalmuanpuia Punte chuan Mizoram leh Nagaland a cheng mipui te'n Free Movement Regime (FMR) tihtawp hi an duh lo tih sawrkar laipuiin a hre tawh a. Chu bakah MZP-te Naga Students' Federation (NSF) leh Mizoram-a NGO Coordination Committee bakah Naga Hoho te'n an duh lo tak tak tih a hai a rin loh thu a sawi a. Free Movement Regime tihtawp chungchangah Chief Minister Lalduhoma'n tunhnaia Delhi a zin khan Prime Minister, Union Home Minister leh External Affairs Minister-te hnenah Mizoram in a dodal thu a hrilh tawh a, chu chu an party ZPM dinna a nih thu leh Mizo mipui ngaihdan pawh hei tho hi a ni a a hriat thu a sawi a. Hemi hma hian Chief Minister Lalduhoma pawhin sawrkar laipui hian Free Movement Regime nuai bo leh Myanmar ramri hung hi a taka a kalpui a rin loh thu a lo sawi tawh a ni.

Adviser to Chief Minister chuan Free Movement Regime tihtawp tumna awm ni awma sawi hi Manipur Chief Minister N. Biren Singh-a ngen vang a nih a rin loh thu a sawi a. A State chhunga Law and Order a kenkawh theih loh avanga lar ve chauh a nih thu leh sawrkar laipui-ah party dang chu sawrkar se la Manipur hi President's Rule a dah a nih daih tawh a rin thu a sawi a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man