Sawrkar thar ah zirna ngai pawimawh dawn

School Education Minister Dr. Vanlalthlana chuan Sawrkar thar ah chuan zirna ngaih pawimawh a ni dawn tih a sawi.

School Education Minister hian nimin khan ‘Surprise Visit’ neiin Govt. Primary School-I, Sairang chu a tlawh a, he hunah hian Minister chuan sawrkar tharah chuan zirna ngaih pawimawh a ni dawn tih sawiin, zirna kalphung tur pawh an ruahman tawh thu a sawi a. Sawrkar hnathawk te, zirna lama tawnhriat ngah te leh mi thahnemngaite thurawn bakah, zirna kaihhnawiha mi thiam zawkte zirchianna leh rawtna an ngaih pawimawh tur thu a sawi a. Thawk lehkhata danglamna thlen chu a harin a that lohna zawk te pawh a awm thin a, sawrkar thar chuan a tahtawla zirna kalphung siamthat a tum thu a sawi a, Sawrkar chu zirna siamthat tumin a tang dawn a; zirtirtu, nu leh pa leh khawtlang pawh chumi tichak zual tura tan tlan vek a tul thu a sawi. Minister chuan hnathawhna hi rawngbawlna kawng khat a nih angin thahnemngai lehzual zel turin zirtirtute a fuih a. Zirtirtu tho a nih angin zirtirtu hna chu mahni tana hlawkna awmah an ngaih loh pawhin, naupang in an hlawkpui a, an seilen zelnaah an hre reng thin a, chu chuan ram leh hnam tan pawh rah tha a chhuah thin a ni, a ti bawk.

He School a tlawhna ah hian Minister hian Zirtirtute kawmin an harsatna hrang hrangte an lo thlen a, Zirlaite pawh Minister hian kawmin zirna chu mi puitling ni tura min chhertu pawimawh tak a nih avangin eng eizawnna kawng pawh zawh dawn ila, zirna hmanga inchher phawt chuan an hriam bik ang a; mihring nunah chuan a taima leh thawkrim apiang an dinchhuah thin avangin thahnem ngai taka lehkha zir turin a fuih a ni.