Ni 100 chhunga thawh tura kan duan tam tak kan ti hlawhtling tawh - Lalduhoma

ZPM Leader leh Chief Minister Lalduhoma chuan Ni 100 chhunga thawh tura an duan tam tak an ti hlawhtling tawh nia sawiin, “Opposition party te chona thianghlima cho kan duh a, kum 5 a ral leh hunah ZPM let thla tur khawpin inbuatsaih rawh se,” a ti bawk.

Kum 2024 atana Aizawl-a ZPM Party Office hawnna leh Chhun Inkhawm nimin-a neih ah ZPM Leader Lalduhoma chuan ni 100 chhunga an thawh tura an duan tam tak an ti hlawhtling tawh nia sawiin, “Theihtawpin hma kan la mek zel a ni,” a ti a. Mipuite chhiah tlingkhawm, a hman lohna tura hmang an awm chuan corruption a ni tih sawiin, “Endiktu leh enthlatu kan ruat tawh a, engkim chiang takin kan hre zel tawh dawn a ni,” a ti a, “Officer pension tawh, sawrkar atanga hamthatna la kan la awm tih kan hria a, chung mite chu reilote chhunga inchingfel turin warning kan pe a, hei hi kan warning tawpna a ni tawh ang,” a ti a. Assembly bial 13-ah an duhthlanna leh zalenna hmang thei lo an la awm chu pawi an tih thu pawh sawiin, “A dang bial 27-te ruala ke an pen ve theihna turin kan dawmkang ve zel dawn a, kan thlauhthla dawn chuang lo. Opposition party te chona thianghlima cho kan duh a, kum 5 a ral leh hunah ZPM let thla tur khawpin inbuatsaih rawh se. Tun atang chuan eng party mahin an kalphung hlui ang kha chuan min hneh tawh lo ang,” a ti bawk.

Myanmar atanga raltlan lokalte chhinchhiahna Biometric Identification chu sawrkar hmasa hmalakna kal zel, an chhunzawm mai tur a ni tih pawh Chief Minister chuan sawiin, “Fimkhur zawka kal kan tum a, thlamuang taka kan awmhona tur ruahmanna Union Home Minister atangin Assurance kan dawng a ni,” a ti a. Ramdang mi kan rama ILP hmanga lo lutte an vei em em tih pawh sawiin, “Mizoram-ah heng mite chhinchhiahna tur felfai leh changkang zawk siam thei an awm a, hmalak tum a ni,” a ti bawk.

Union Minister of Road Transport Nitin Gadkari hnenah kum khat hun pe tur leh kum khat chhunga an thawh theih fiah tura a dil thu ZPM Leader chuan sawiin, “Hna chak taka kan thawh theihna turin Aizawl Eastern by-pass Road, sawrkar hmasain a lo buaipui tawh hmalak nghal a nihna turin sanction kan nei tawh a ni. Hna kal lai, loh theih loh a chhunzawm ngai a awm a, cancel ngai erawh engemawzat awmin heng sum chuang bang hi ba rulh nan kan hmang dawn a ni,” a ti bawk.

Sairang leh Seling inkar By-pass Road NHIDCL-in an khawih tur ah Engineering, Procurement and Construction (EPC) System hman a ni dawn tih pawh Lalduhoma chuan sawiin, “He kawng hi Double Lane a ni dawn a, Bawngkawn Brigade atanga hmar lam hretah lei kan verh anga, Tuirial pawhthla in Seling thlen hma Phaibawk kawn-ah National Highway No.6 a pawh ang. He kawng hi KM 34 a ni dawn a, kawng pangngai aiin KM 22 in a hnai zawk ang. Leiverh (Tunnel) tur bik hi pawisa min release thei rih lova, mahse kan dil hnuah Road Transport and Highways Minister Nitin Gadkari chuan leiverhna tur bik liau liau atan cheng vbc. 1313.28 min remtihsak a, he hna hi a chak thei ang bera thawh kan tum dawn a ni. Delhi-ah khan thil dil tura zin kan ni lova, inhmelhriatna tha leh thawhhona tha kan neih theihna tura kal mai kan ni,” a ti bawk.

He hunah hian Home Minister K. Sapdanga pawhin Mizorama dan bawhchhiatna chi reng reng tihrem tumin Home Department atangin tan lak an tum dawn tih sawiin, “Mizo-ram a Smugling nasa lutuk hi thla khat chhung ngeia tihrem kan tum bawk,” a ti a. Entitlement chungchangah Home Department-in Department dang entawn tur siam an tum thu pawh sawiin, “Theih tawp leh dik taka kan thawh theih nan mipuite’n min lo thlahfal lawk teh u,” tiin a ngen bawk a ni.