Bank hotu ten CM hnenah an hmalakna te an thlen

Mizoram Rural Bank (MRB) Chairman Sheryl L. Vanchhawng leh a thawhpuite chuan nimin khan Chief Minister Lalduhoma chu a Pisa-ah hmuin lawmpuina an hlan bakah an dinhmun leh hnathawh te sawiin, sawrkar nena indawrna tam zawk neih an duh thute an thlen.

Chief Minister chuan MRB chu mipuite mamawhna avanga inzauh zel tura an nawr ngam Bank an nih thu sawiin, “In CD Ratio ni se a tha ber te zinga mi a ni thei reng bawk a. Mipuite leh sawrkar atang pawhin duhsak in phu hlein ka hria,” a ti a. Sawrkarin a taka Hand Holding Policy a kalpui hunah phei chuan bank te nen inhnaih taka thawh a tul dawn thu a sawi a. MRB hotute pawhin an Bank kaltlanga sawrkarin sum tam zawk a khawih ve theihna tur dilin, MRB Manager atana Mizo thalai tling thei an tlem avanga an mangan thu pawh an thlen bawk.

Nimin vek khan SBI Aizawl-a Regional Manager & SLBC Convener Rakesh Ravi pawhin Chief Minister hi a Pisa-ah hmuin lawmpuina a hlan bakah an hmalakna hrang hrangte a hrilh a. Chief Minister pawh hian Hand Holding Policy kalpui dan tur tlangpuite a lo hrilh bakah, CD Ratio tha zawk neia, mipuite tana a zau thei ang bera in hawng turin a hrilh a. Bank kaltlanga sawrkar Scheme kalpui thinah te a kaihhruai sawrkar chuan engkim uluk tak leh dik taka an kalpui tur thu pawh hrilhin, beneficiary thlan thuah pawh a tling leh tlak te chauh an thlang thin dawh tih a lo hrilh a ni.