Field Veng VC by-election ZPM chiah in chuh dawn

Serchhip Field Veng VC-a Seat ruak pakhat hnawhkhahna tura by-election neih turah ZPM Ticket-a ding chu chuhtu awm lova tlingah puan a nih a rinawm.
Serchhip Field Veng VC-a General Seat luahtu Member pakhat chu a boral avangin State Election Commission chuan he Seat ruak hnawhkhat tur hian tun thla ni 30 khian by-election nei turin ruahmanna a siam a, he inthlanna chuh tur tan hian nimin tlai thleng khan hming pekluhna hun hi hawn niin ZPM Ticket-a chuh tur B. Remsangzuala chiahin Returning Officer hnenah Nomination paper a thehlut a, tun thla ni 15 thleng inhnuhdawhna hun hawn niin a inhnuk-dawk lo a nih chuan tling-ah puan a ni dawn a ni.

Tarlan tawh thin angin Serchhip Field Veng VC-ah hian Seat 5 awmin heng zinga Seat pakhat chu hmeichhia te tana hauh a ni a. VC inthlanpui hnuhnung berah khan MNF chuan Seat 3 lain ZPM in Seat hnih an la a, ZPM atanga thlantlin VC Member Zothanpuia chu nikum hmasa khan a boral tak avangin Seat ruak pakhat a awm a, hemi hnawhkhahna atan hian tun thla ni 30 khian by-election hi neih tur ni mah se Inthlan chuh tura hming pelut mi pakhat chauh an awm tak avangin mipuite tan Vote thlak ngai lovin he inthlan chuh tura hming pelut awmchhun hi tling ah puan a ni ang a. Heti hian MNF in Seat 3 la neiin ZPM in Seat 2 an nei leh dawn a, MNF hian VC Executive Body an la siam zui dawn tho a ni.

Nimin khan Serchhip East Block MNF chuan thuchhuah siamin Serchhip Field Veng VC by-Election ah hian MNF in Candidate neiin thlantlin a ni emaw, ni lo emaw pawh ni se VC Sawrkarna hi a inthlak phah dawn chuang lo tih an tarlang a. Nakum 2025 hi VC General Election hun a lo ni tawh bawk avangin, he hun chhung reilo te hi chu VC Member boralta Zothanpuia (Puitea) thlarau zah vangin chuh ve rih loh mai nise tiin Block Committee chuan an rel thu an tarlang bawk a ni.