Pesticides Residue Anaysis Lab. atan sum pawm

Chief Minister Lalduhoma chuan College of Veterinary Science & Animal Husbandry, Central Agriculture University-a eitur thlai thianghlim leh thianghlim loh endikna, Pesticides Residue Anaysis Laboratory leina tur sum chu RKVY atanga pek tura approve a nih tawh thu a sawi.

College of Veterinary Science & Animal Husbandry, Central Agriculture University-a Dean Dr. Lalnuntluangi Hmar leh a thawhpui te chuan nimin khan Chief Minister Lalduhoma hi a Pisa-ah kawmin eitur thlai thianghlim leh thianghlim loh endikna, Pesticides Residue Anaysis Laboratory leina tur sum an dil chu RKVY atanga pek tura approve a nih tawh thu Chief Minister chuan a lo hrilh a. Chief Minister chuan NE India huama a hmasa ber tur nia an sawi he Laboratory hi Mizoram tan mai ni lo, hmarchhak State te tana tangkai tak tur a nih avangin sawrkarin a ngai pawimawh tih Dean leh a thawhpuite hi a lo hrilh a. An Fund dil chu RKVY atanga pek tura pawm (approve) fel tawh a ni tih sawiin, mamawh dang an sawi, an hmunhma tihlen a tulna te, tuilak mumal leh hnianghnar zawk an mamawhna te pawh a theih anga a ngaihtuah tur thu a lo hrilh a ni.

College of Veterinary Science & Animal Husbandry, Central Agriculture University-a thawktute chuan Chief Minister thar lawmpuina an hlan hnuah thusawiin Dr. Lalnuntluangi Hmar chuan, Pesticides Residue Analysis Laboratory hi kum hnih kalta atanga an buaipui tan thu leh mipuiten eitur, a bikin phai atanga lo lut chawhmeh te Tur leh chemical him lo dang an la pai leh pai loh endik theihna tur a nih avangin a tangkai hle dawn thu leh nghakhlel hle tih a sawi a. “Laboratory building tur hi kan nei sa a, a enkawl thei mithiam pawh kan nei a, Laboratory Scientist post pawh a awm a ni. A khawl ber kan neih miau loh avangin a post hi kan hnawhkhat lo mai zawk a ni,” tiin Laboratory nei tura pawimawh dangte an neih thu a sawi a. Khawl ber sawrkarin a ngaihtuahsak chuan tangkai takin an hmang ang tih a sawi bawk.

Selesih-a Vety College tia kan hriat lar College of Veterinary Science & Animal Husbandry hi Central Agriculture University, Imphal hnuaia College pakhat a ni a. He University hnuaiah vek hian Horticulture College pawh Thenzawl-ah a awm a. Selesih Vety College-ah hian Under-Graduate (Bachelor) Seat 85, Master Degree Course, Department 16 leh Doctorate zirna Department, 10 a awm mek a. Bachelor bikah hian seat zaa sawmpanga, Post Graduate-ah seat pakhat theuh leh Ph. D-ah department pahnih te Central in a hauh a, a bak zawng chu Mizoram atanga hnawhkhah a ni thin. Faculty zinga mi pakua te chu Mizo an ni. An zirlai batch hmasa ber hi kum 1997 khan West Bengal ah admit an ni a, kum 1998-ah Selesih-ah admission la zuiin, kum 1999 ah West Bengal a admission tite pawh lak chhoh vek an ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man