Serchhip-ah pungkhawm lo in hmalakna thlawp a ni
Mizoram NGO Coordination Committee in nimin khan Mizoram hmun hrang hrangah ‘Kristian Ni Serh Humhalhna Punkhawm’ huaihawtin Serchhip-ah chuan punkhawm hi neih a ni ve lo thung a, hemi denchhen hian Serchhip District NGO Coordination Committee chuan thuchhuah siamin Mizoram Legislative Assembly inthlanpui 2023-a Vote chhiar ni (Counting Day) atana Election Commission of India in December 3, 2023 (Pathianni) a ruat chu Kristian te ni serh a nih avanga tlawmngai pawl hrang hrang leh Political Party bakah Mizoram Kohhran Hruaitute Committee (MKHC) ten Inrinni leh Pathianni ni lo ni dang-a sawn tura ngenna an thlen ah a hlawhtlinna hmuh tur awm lova ‘Kristian Ni Serh Humhalhna Punkhawm’ hial neih a ngai ta chu pawi kan ti hle tih an tarlang a. Hemi chungchanga Mizoram NGO Co-ordination Committee hmalakna an thlawp tlat thu tarlangin, he hmalakna kal zelah Mizoram Kohhran Hruaitute Committee (MKHC) in December 3, 2023 (Pathianni)-ah Pathian biak inkhawm bak chu mipui punkhawmna lam chi buatsaih lo tur leh Party Office-te pawh hawng lo tura a ngenna chu tha an tih thu leh Serchhip District-a Political party hrang hrangte pawh hei hi zawm theuh turin an ngen bawk.
Serchhip District NGO Coordination Committee chuan kan Hnam leh kan Sakhua a lo him a, Sakhaw zalenna kan neih zel theih nan Mizoram mipui zawng zawngte tangrual sauh sauh turin an sawm a. “Tun hnuah Kristian te ni pawimawh leh serh bik-ah hetiang hun pawimawh ruat hi awm tawh lo se kan duh a ni,” an ti bawk.
Thudawn danin nimin-a ‘Kristian Ni Serh Humhalhna Punkhawm’ hi District khawpui zingah Serchhip bakah Kolasib, Mamit, Khawzawl, Saitual leh Hnahthial-ah te pawh an nei lo a ni.
Comments
Post a Comment