Inthlanpui-a Vote tla te chhiar turin Serchhip District-ah inbuatsaihna peihfel a ni
November 7, 2023-a Mizoram Assembly Inthlanpui-a Vote thlak tluang taka zawhfel a nih hnuah he inthlan a Vote tla te hi naktuk zing dar 8:00 atang hian District tinah a ruala chhiar a ni dawn a, hemi atan hian Serchhip District-ah pawh inbuatsaihna peihfel ni tawhin nimin khan Micro Observer te tana Training neih a nih bakah Counting Assistant leh Counting Supervisor te tan Vote chhiar dan tur a tak anga tih chhinna chu neih a ni a. Heti hian Vote chhiar tura Training chu zawhfel a ni ta a. Vawiin hian 2nd Randomization neiin Vote chhiar tur te leh an chhiarna tur bial te tihfel leh a ni dawn a ni.
Tarlan tawh angin Serchhip District chhung Assembly Bial pathum-a Vote tla te chhiar nan hian Serchhip DC Office Complex chu Counting Centre-ah hmangin Counting Hall pathum, Constituency pakhat tan Hall pakhat zel siam a ni a. Counting Hall pakhat ah hian Dawhkan pariat (8) zel dahin Polling Station number indawt zelin tum khat-ah Polling Station 8 zel chhiar theih a ni dawn a, Serchhip District chhunga Assembly bial pathu-a Vote tla te hi Round 4-ah chhiar zawh hman vek tura ruahman a ni a. Hei bakah hian Postal Ballot chhiarna tur ruahman a nih bakah VVPAT-a Vote tla thenkhat te pawh chhiar a ni dawn bawk a ni.
Serchhip DIPRO leh I&PR Deputy Director Lalnunmawii chuan nimin khan Serchhip a thuthar thehdarhtute a Pisa-ah leng-ah sawmin Inthlanpui-a Vote tla chhiar tura inbuatsaihna leh Media ten Inthlan result an puanzar zung zung theih dan tur a sawipui a. He hunah hian DIPRO chuan naktuk Pathianni zing dar 5:00-ah Counting Official 3rd Randomization neih a nih dawn thu leh zing dar 7:00-ah Strong Room te hawngin Vote thlakna khawl te Counting Hall-ah lakluh a nih zui dawn thu a sawi a. Zing dar 8:00-ah Postal Ballot hmanga Vote tla te chhiar tanin hemi atanga darkar chanve-ah EVM-a Vote tla te chhiar zui a nih dawn thu a sawi bawk.
Serchhip DIPRO chuan Inthlan result te awlsam zawka puanzar a nih theihna turin Serchhip DC Office-a Addl. DC Room-ah ‘Media Centre’ siam a nih thu sawiin, hetah hian inbiakpawhna atana hmanraw pawimawh turte chhawpchhuah a nih dawn thu leh Inthlanna a Candidate te Vote hmuh zat chu Round tinah Returning Officer ten an tihchian hnuah Media Centre-ah pechhuakin hei hi Media mi ten an puanzar theih dawn thu a sawi a. Vote chhiarna chhungah hian Observer leh RO bakah ARO ten Mobile Phone kenglut theiin Media Centre-ah hian Media mi ten Phone an kenglut thei dawn tih a sawi a. Counting Hall chhunga Media mi te an luh theihna turin Authority Letter ECI in a siam chu a sem nghal bawk a ni.
Comments
Post a Comment