Raj Bhavan-ah State 2 te dincham lawmna nei

Mizoram Governor chuan nimin khan Aizawl Raj Bhavan-ah Ek Bharat Shreshta Bharat hmalakna hnuaiah Nagaland State Day leh Assam Day (Asom Day) lawmna hun a buatsaih.

Nimin a he hun buatsaihtu Governor Dr. Hari Babu Kambhampati chuan State pahnih mipuite lawmpuina thu sawi hmasa in, Assam leh Nagaland te State anga a lo pian theihna tur hruaitu hmasa leh theih-tawp lo chhuahtute zahna chibai a buk bawk a. State dangte dincham in lawmpuina hian State danga chengte nena inpawhna tha zawk leh India ram anga inpumkhatna a siam tih a sawi a. Hnamdang te nena in thiantha tur chuan an culture leh an nunphung te kan hriat a, kan zah sak a pawimawh thu a sawi bawk.

Assam State hi January 26, 1950 khan India Sawrkar hnuaia State a ni tawh a, kum 1996 atang khan kumtin December 2 hi Assam-ah chuan Sukaphaa Divas tiin emaw, Asom Divas (Assam Day) tia hman ziah a ni tawh thung a. Hei hi Patkai tlang rawn kalpela Asom Lal hmasa berin Assam luhna ni hriatrengna atana hman a ni a. Hetihlai hian Nagaland hi December 1, 1963 khan State-ah puan a ni a, Indian Union State 16-na a ni thung.

Nimin-a he hun hmanna ah hian heng State pahnih te chungchang Video Clip chu thlirho a ni a, State pahnih te aiawhin zirlai hruaitu pahnih ten thu an sawi bakah Assam leh Nagaland State mi, Mizoram-a sawrkar hnathawk te pawhin thu an sawi bawk a. Cultural item, Zai leh lam te entir a ni bawk.