Mizoram MP Japan-ah zin

India hmarchhak-a MP paruk (6) te chuan Inrinni kalta atang khan Japan ram fang mekin Vawiin hian India-ah an rawn let dawn a, heng MP te zingah hian Mizoram Lok Sabha MP C. Lalrosanga pawh a tel a ni. Japan ram-a kal heng MP rual te hian Japan mi pawimawh te hmu kualin India leh Japan thawhdunna leh inkungkaihna te huamzau zawk leh nghet zawka siam dan turte an sawipui a. Japan MP te nen an inkawmna ah Mizoram MP C. Lalrosanga chuan Japan ramah Mizo thalaite tan eizawnna kawng hrang hrang a inhawn theih thu sawiin, Mizorama hna nei lo thalai mithiam Japan tawng zir thiam tan Japan ramah eizawnna kawng a inhawng thei dawn a ni, a ti a. Japan company hrang hrangte tan Mizoram leh hmarchhak bial State dangah te hmasawnna hna thawh tur hrang hrang a awm thu a sawi bawk.