Latest News

Kristiante Ni serh humhalhna punkhawm neih a ni

Mizoram Assembly Inthlanpui vote chhiar hun tura ruat sawn tura Election Commission of India hnena ngenna hlawhtlinna hmuh anih loh avanga All NGO Coordination Committee ten an huaihawt ‘Kristiante Ni Serh Punkhawm’ hi nimin khan District hrang hrangah neih a ni a, Aizawl ah chuan Raj Bhavan kawtah hun hman a ni.

Nimin-a he punkhawm neih ah hian All NGO Chairman leh Central YMA President Lalhmachhuana chuan Mizo Kristian te chu in lungrual a pawimawh tih sawiin, Kristian te ni pawimawh humhim turin mi tin te tanrual a pawimawh thu a sawi a. Mizo Kristian zingah he hun hman tullo ti an awm chu a pawi takzet tih sawiin, tanrual tul hun laia ngaihdan hrang lo awm chu Kristian te in enfiah a pawimawh takzet tih a sawi a, he hun hmanna ah an beisei anga thawkchhuak an tamlo chu pawi a tih thu a sawi bawk.

Election Commission of India in Vote chhiar ni a rawn ruat atangin party hrang hrang leh Tlawmngai pawl bakah Kohhran ten an duhlohna an thawn thu NGOCC Chairman chuan sawiin, an ngenna in awmzia a neihloh avang leh chhanna an hmuhloh avangin Delhi-ah anmahni ngei hmua ngen turin an kal thu leh an kal dawna helai ECI mi leh sa, CEO ten appointment an hmuh theihna tura an pui tha tawklo chu a lungawi thlak loh thu leh Mizote ngaih pawimawh an hlawhlo hle tih a sawi a. Mizote chu hnam chungchang leh Sakhaw chungchang ah punkhawm a ngai fo thin tih sawiin, hei hian Mizote inlungrualna ti tha se a duh tih a sawi bawk.

Central YMA President chuan Kristian Sakhua a him loh chuan Mizo Hnam pawh a him theilo tih sawiin, ECI in Mizote kil hrang hranga an ngenna chhan tlakah a ngailo chu pawi a tih thu leh Vote chhiar ni ah an duhlohzia lantir nan Political Party tin te Pisa hawnglo turin a duh thu a sawi a, Party mi leh sa te pawh inthlan kaihhnawiha Duty an nih loh chuan Inkhawm tibuaia inhnamhnawih lo tura ngenin, Candidate tling te pawh Pathianni-a Certificate la lo ngam tura a duh thu a sawi bawk.

Nimin-a punkhawmna a tel te hianm Resolution pahnih pass in, ‘Election Commission of India in Mizoram Assembly inthlanpui, 2023 Vote chhiar ni atan Kristian te ni serh leh Pathian kan biakna ni, Pathianni (December 3,2023) a ruat hi tha lo kan ti a, pawi kan ti takzet a ni,’ an ti a. ‘Election Commission of India ( ECI) hian Vote chhiar ni atan Pathianni a ruat tawh hi sawn ngei turin Vawiin-a kalkhawm te hian kan ngen nawn leh a ni,’ an ti bawk.

Kristiante Ni serh Punkhawm Aizawl-a neih ah hian Mizoram Kohhran Hruaitute Committee (MKHC) hotute leh MZP leh MSU bakah MHIP President theuh ten thu an sawi a, Lunglei leh Champhai-ah te pawh he hun hi hman a ni bawk.

Comments

Popular News (Last 30 Days)