Kum 2019-2023 chungin Mizoram-ah Silai leh a mu man kaihhnawih ah thubuuai 83 ziahluh a ni

Mizoram Police chuan kum 2019 atanga kumin 2023 thlengin Silai leh a mu (Ammunition) man chungchang ah thubuai ziahluh 83 neiin, mi 119 man an nei.

Home Department in tunhnaia an tihchhuah Achievement Report (2018-2023) a tarlan a nih danin, kum 2019-ah Mizoram-ah dan lo a silai leh a mu kawl/tawlh thubuai 15 ziahluh a awm a, mi 18 man an nei a,. Kum 2020-ah thubuai 6 ziahluh neiin, mi 10 man an nei leh bawk a. Kum 2021-ah thubuai 18 ziahluh nei bawkin, mi 27 man an nei a, kum 2021-ah thubuai 28 ziaklut lehin mi man 38 an awm a. Kumin kum kal mek 2023-ah Silai leh a mu man chungchang ah thubuai 16 ziahluh nei leh tawhin mi man 26 an nei leh tawh bawk a ni.

He Report-a tarlan a nih danin kum 2019 a Mizoram-a silai chi hrang hrang an man te chu a vaiin 27 a tling a, kum 2020-ah silai chi hrang hrang 42 zet man an nei leh bawk a. Kum 2021-ah silai chi hrang hrang 68 man neiin, kum 2022-ah silai chi hrang hrang 81 man an nei leh bawk a, Silai man te a pun chhoh laiin kumin 2023-ah erawh tlahniam in Silai 29 man an nei leh tawh bawk a ni.

Kum 2019 atanga kumin 2023 thleng a silai an man zingah hian tualchher silai man chu a tam ber a ni a, heng baka Silai an man dangte chu AK56 Rifle te, .22 Caliber AK Rifle te bakah, .303 Rifle (Made in China) te leh silai chi hrang hrangte an ni.