Latest News

Kum 18 chhunga ruihhlo hmansual vanga thi tam ber tum kumin ah mi 68 an thi tawh

Kumin January 1 atanga December 1 thleng khan Mizoram-ah ruihhlo hmansual vangin mi 68 an thi tawh a, tunhnai kum 18 kalta chhunga ruihhlo avanga Mizoram-a thi an tam ber tum a ni.

Excise & Narcotics Department chhinchhiahna atanga a lan danin kumin (2023)-a ruihhlo hmansual avanga Mizoram-a thi mi 68 zinga 57 te chu mipa niin midang 11 te chu hmeichhia an ni a, heng ruihhlo avanga thi te hi Heroin kaihhnawih a thi deuh vek niin an zinga pakhat hi Heroin leh Alprazolam tih pawlh vanga thi a ni thung a ni. Chhinchhiahna atanga a lan danin kum 1984 atanga kumin thlengin Mizoram-ah ruihhlo vangin mi 1,803 an thi tawh a, an zinga 1,587 te chu mipa an ni a, hmeichhia 216-in an thi tawh bawk.

Kum 2004 kha Mizoram-a ruihhlo vanga thi an tam ber tum niin khami kum khan mi 143 an thi nia chhinchhiah a ni a, heng te hi mipa 122 leh hmeichhia 21 niin khatih hunlai khan Proxyvon chu an thihpui tam ber a ni a. Hemi hnua Mizoram-a ruihhlo avanga thi tam ber leh tum hi kumin-ah a thleng leh mek a, Heroin avang hian kum 2015 atang khan Mizoram-ah thi an tam tan a, kum 2005 hnulam ah kum 2020 kha ruihhlo avanga thi tam ber kum niin khami kum khan mi 67 an thi a, hei hi kumin hian khum niin kumin hian ruihhlo avangin mi 68 an thi tawh a, kumin hi kum 18 kalta chhunga ruihhlo vanga thi an tam ber tum niin thla khat dawn hun a la awm avangin hei ai pawh hian ruihhlo vanga thi hi awm belh leh thei dinhmunah a ding a ni.

Kumin hi END in kum khat chhunga Heroin an man tam ber kum ni mek bawkin kumin hian Heroin kg. 76.219 zet an man tawh bawk a. Heng bakah hian kumin Jauary 1 atanga December 1 thleng khan Rakzu litre 84742.290 man tawh bawkin Zu bilhlai Tin 185,699 an tichhe tawh bawk a. A senchi/IMFL um puitling 22703, a chanve um 3351 leh a quarter (ml.180) um 3677 an man tawh a. Burma atanga lokal an tualchhung zu (BEDC) pawh litre 2621.200 man a ni tawh bawk. Hemi hun chhung hian Beer pawh thahnem tak man tawhin Canned Beer (500 ml) 42697 bakah 300 ml chi 627 leh, a um chi 795 an man tawh a. Zu siamna kaihhnawih ah Bel 2771 man a ni tawh a, dawidim kg. 604.643 an man tawh bawk.

Excise & Narcotics Department hian MLA inthlanpui vuatvetah zu leh ruihhlo hmanga vote lei tumna emaw, inthlan kaihhnawiha diklo taka Zu leh ruihhlo leh a kaihhnawih hman vanga hetiang thil man an nei lo tih an sawi a ni.

Comments

Popular News (Last 30 Days)