Rualbanlote ni-ah MBS in lawmthu an sawi

Nimin December 3, 2023 kha khawvel puma rualbanlote Ni, ‘World Disabled Day’ niin Mizoram Blind Society chuan Mizoram sawrkar, Kohhran leh mipui zawng zawng rualbanlo khawngaiha tanpui thintute hnenah lawmthu an sawi.

Mizoram Blind Society chuan thuchhuah siamin, Mizoram-a rualban lo zawng zawngte, rualban lo enkawltu pawl hrang hrangte, Mizoram Sawrkar hruaitute, Kohhran leh khawtlang hruaitute leh rualbanlo te khawngaiha tanpui thintu zawng zawngte duhsakna chibai an buk tih sawiin, rualbanlote tanpui thin zawng zawng chungah lawmthu an sawi a. State dangte ang bawka Mizoram sawrkarin pianphunga rualbanlo te hmakhua ngaia hamthatna hrang hrang - zirna, sawrkar hna leh retheihna umbona scheme hrang hrangahte a siam avangin Mizoram sawrkar chungah lawmthu an sawi a; rualbanlo te hmasawnna tura mahni theihna zawn zela thahnemngai taka hma la zel turin mi tin an ngen bawk.

Rualbanlohte Ni hi kum dangah chuan Mizoram sawrkarin a bika hun siamin hman a ni thin a, kuminah erawh Pathianni a nih avanga hman a rem loh avangin thuchhuah hi siam a ni a. Mizoram hmun thenkhat ah chuan kar kalta khan he ni pual hian hun hman a lo ni tawh bawk a ni.