Mizoram Assembly inthlanpui 2023-a Vote tla te tukin dar 8:00 atangin chhiar a ni dawn

Election Commission of India in Mizoram State Legislative Assembly Inthlanpui-a Vote tla te chhiar hun atana December 4, 2023 a ruat angin tukin dar 8:00 atang hian Mizoram District hrang hrangah Vote tla te hi chhiar a ni dawn ta a, Chawhnu lamah result kimchang hriat theih beisei a ni.

Mizoram Chief Electoral Officer, (CEO) Madhup Vyas-a chuan Inthlanpui vote chhiar hun atan inbuatsaihna peihfel a ni tawh tih sawiin, Vote chhiar chu boruak muanawm tak hnuaia neih a nih theih nan theihtawp chhuah a nih thu leh Venhimna lam hna thawk turin Mizoram Police te leh Central Armed Police Force te Counting Hall tinah dah an nih thu a sawi a. Vote tla te hi Counting Hall 40-ah vote chhiar a ni dawn tih sawiin, Assembly bial tinin Counting Hall hran an neih tur thu te, Counting Observer-in an thutchilh tur thu te a sawi a. Aizawl District bikah hmun thum-ah vote chhiar a nih dawn thu te, heta duty tur venghimtu sipai lam pawh an inpeih tawh thu te a sawi a. Vote chhiartu turte pawh an hriat tur tul te hrilh vek an nih tawh thu a sawi bawk.

Election Department thawktute chuan Vawiin-a Vote chhiarna ah hian Postal Ballot, Service Voters leh Home Voting te chhiar hmasak a ni dawn a, hemi hnu hian EVM a vote tla te chhiar leh a ni ang tih an sawi a. Mizoram Additional Chief Electoral Officer H. Lianzela chuan vote chhiar turin engkim peih fel tawh a nih thu sawiin, Duty tur te pawhin training leh tihchhinna felfai takin an zo tawh a, District tinah engkim peihfel a ni tawh, a ti a. Inthlana vote tla te hi District hrang hrang 11-ah mi 4000 chuangin an chhiar dawn a, harsatna awm lovin zing dar 8:00-ah chhiar tan vek theih beisei a ni tih a sawi a. Vote chu District hrang hranga Counting Centre 11-ah chhiar a ni ang a, Counting Hall 40 awmin Observer ten an vil theuh dawn a, Counting Hall-ah hian EVM Dawhkan 399 awmin Postal Ballot chhiarna tur Dawhkan 56 a awm dawn thu a sawi bawk.

Kumin ah hian Election Commission of India ruahmanna in EVM (Control Unit) a vote tla chhiar zawh vek hnu hian Constituency tina Polling Station 5-a VVPAT a vote tla (paper slip) te chu EVM (Control Unit) a vote tla nen a inmil em tih finfiah zel tur a ni a, VVPAT chhiar turte hi pawhfuh hmanga thlan tur niin hetianga VVPAT-a vote tla chhiar (mandatory verification) hi inthlanpui hmasa ah khan Constituency tina VVPAT pakhat zelah neih a ni a, kumin inthlanpuiah hian Constituency tinah VVPAT 5 zel chhiar tel tawh tur a nih dawn avang leh a ruala chhiar lova a indawt a chhiar tur a nih avangin vote chhiar hun chhung pawh a rei phah hret thei dawn a ni.

Addl. CEO Lalnunfela Chawngthu chuan vote chhiar chu Control Unit a chian loh chuan hun a duh rei thei tih sawiin, Bial tina VVPAT 5 chhiar ngei ngei tura ruahman bakah Control Unit a chian loh chuan VVPAT hmanga chhiar a ngai dawn tih a sawi a. Kumin inthlan atanga hman tan Home Voting te pawh Postal Ballot-ah chhiar tel vek a nih dawn avangin hun dang aiin Postal Ballot chhiar tur a tam a, vote chhiar chhung a rei phah ve thei tih a sawi bawk.

Vawiin-a Assembly Inthlanpuia Vote tla te chhiar a nih dawn avang hian Election Commission of India atanga thupek an hmuh bawhzuiin Commissioner of Excise & Narcotics, Excise & Narcotics Department, Mizoram chuan Rule 5 of the Mizoram Liquor (Prohibition) Rules, 2022 in thuneihna a pek tlawhchhanin Vawiin, December 4, 2023 (Thawh-tanni) hi Mizoram pumah Zu khap burna, Dry Day-ahy a puang a, he thupek hi vote chhiar zawh thleng kenkawh tur niin hemi hun chhung hian Military Canteen atanga Zu zawrh chhuah leh in khap tlat a ni a. He khapna thupek hi mipui nawlpuiah chuan Dan dinglai hman mek a ni.