ZRI Vohbik’s Got Talent 2023 buatsaih dawn

Zo Ri-mawi International (ZRI) Charity Group chuan a vawi khat nan Vohbik (Rualbanlo) te pualin 'ZRI Vohbik’s Got Talent 2023' an buatsaih dawn.

He Reality Show buatsaih turah hian Zoram chhung leh pawna Zofa a duh apiang tel theih niin kum bithliah a awm lo a. November 14, 'National Childrens Day' zan dar 7:00-ah Vanapa Hall-ah zaithiamte nen a khuhhawnna ropui tak hman a ni ang. He Reality Show-ah hian intihsiak chi hrang hrang a awm dawn a, December 2, 2023-ah a hmawr bawk a ni ang. Ruahman lawk ang chuan 1st Round hi Video clip hmanga neih tur a ni dawn a, heta tang hian 2nd Round lut tur Top 20 thlanchhuah a ni anga. Top 20 te hi November 24 atangin Zarkawt Comunity Hall-ah an intihsiak dawn a, chuta tang chuan a titha zual Top 10 thlanchhuah leh a ni ang. December 2 zan 7:00-ah Grand Finale neih a ni ang a, pakhatna in Rs. 1,00,000 an dawng thei dawn a ni.