Aizawl-ah Traffic Signal Light hmang chhin dawn

Aizawl khawpui chhunga Traffic Signal Light dah zinga thenkhat chu karleh Thawhtanni khian enchhinna neih a ni dawn.

Aizawl-a Sr. SP (Traffic) in thuchhuah siama a tarlan danin Aizawl khawpui hmasawn zel theih nan Aizawl Smart City Ltd. in traffic enkawlna felfai leh tha zawk a awm theih nana a ruahman – Adaptive Traffic Control System (ATCS), Traffic Signal Light (a sen, a eng leh a hring) hmanga lirthei tlan dan enkawlna tura Bazar Bungkawn leh Bawngkawn, Sairang penga a dahte chu karlah Thawhtanni, Nov. 13, 2023 atangin inzirtirna leh enchhinna hun hman tur a ni. He enchhinna hi chawhma dar 11:00 atanga chawhnu dar 3:00 thleng neih thin tur a ni. He enchhinna hi tluang taka kalpui a nih theih nan leh Traffic Signal Light hi Aizawl khawpuiah engtiang chiaha hman tur nge hriat a nih theih nan lirthei khalhtute chu Traffic signal light awmzia lo hre thar tur leh Traffic Police duty-te thu ngaichang turin a hriattir a, enchhin laia signal light zawmlote chu MV Act hnuaiah hrem theih an ni ang tih a tarlang bawk.

Aizawl-a Sr. SP (Traffic) chuan Traffic Signal Light-a Rawng sen (Red) a eng a nih chuan lirthei tlan laite chu din tur a nih thu leh Kawngpui vang tan zawnga rawng vara rin ‘STOP’ tih inziahna ah din tan tur a ni tih a tarlang a. Rawng eng (Yellow) a eng a nih chuan tlan mai thei tura lo inrin tawh tur a nih thu leh lirthei te tihnun tur a nih thu tarlangin, Rawng hring (Green) a eng a nih chuan tlan tur a nih thu a tarlang bawk a. Traffic Signal Light hman dan Video Clip leh thlalak te chu Aizawl Traffic Official Facebook Group ‘Aizawl Traffic Police’ ah en theih a nih thu leh lirthei khalhtute’n zawm theuh tur leh an tlan theih huna tlan mai thei tura Countdown Timer uluk taka en turin a chah bawk.