Aizawl-ah Legal Services Day hman a ni

Mizoram State Legal Services Authority leh High Court Legal Services Committee, Gauhati High Court te tangkawp chuan nimin khan ‘Legal Services Day’ hmangin, Legal Services provider ti tha te hnenah chawimawina thilpek an hlan.

India sawrkarin 'The Legal Services Authorities Act, 1987 a pass chu November ni 9, 1995-ah hman hman tan a ni a. He dan hman tan ni hi ‘Legal Services Day’ atana hman thin niin, kumtin mipuite hnena dan chungchang zirtirna leh khawtlang tana tangkai tur zawnga hman thin a ni a. Nimin-a he ni puala Gauhati High Court, Aizawl Bench Conference Hall-a hun hman hi Gauhati High Court Judge, Mizoram SLSA Executive Chairman ni bawk Justice Michael Zothankhuma chuan hmanpuiin Legal Services Authority din chhoh dan te leh mipui tana an hmalakna hrang hrang te a sawi a. Mizoram chu ruihhlo tawlhna kalkawng a nih avanga ruihhlo do kawngah pawh tan tlan a tul thu te, Court leh mipuite thawhhona tha a awm a tul thu te a sawi a. Environment humhalh a tul thu pawh Justice Michael Zothankhhuma chuan sawiin, kum 10 chhungin Tlawng lui tui chu za-a 50 zeta a tlem tawh thu te a sawi a. Ramngaw te humhalh tura mipui tantlan a tul thu a sawi bawk.

Legal Services Day puala inkhawm hi Mizoram State Legal Services Authority Member Secretary Gracy L. Bawitlung chuan  kaihruaiin Gauhati High Court Judge, High Court Legal Services Committee, Gauhati High Court, Aizawl Bench Chairman ni bawk Justice Nelson Sailo chuan High Court Legal Services Committee hnathawh hrang hrang leh Lok Adalat an kalpui dan bakah a thlawna Ukil rawihsak a nih chungchangte a sawi a. Justice Marli Vankung pawhin dan hriat loh chu hremna pumpelhna atan chhuanlam a tling lo tih hriaa Legal Services Authority in kawng hrang hrangin mite dan hrilh hre turin hma a lak thin thu a sawi bawk.

He hunah hian Community Para Legal Volunteer (Community PLV) ti tha ber, Best Community PLV chawimawina chu HL Biakmawia, Rengdil, Mamit District hnenah hlan niin, Best Student PLV chawimawina chu David Malsawmtluanga, Govt. Mizoram Law College hnenah hlan a ni a. Best Panel Lawyer in Magistrate Triable Cases (Civil & Criminal) atan H. Vanlallawmzuala, Advocate, Aizawl chu thlan a nih bakah Best Panel Lawyer in Sessions Triable Cases (Civil & Criminal) atan K. Laldinliana, Advocate, Aizawl thlan a ni bawk.

Legal Services Day inkhawm neih zawh a nih hnu hian he ni denchhen hian faina hnatlang neih chhunzawm nghal a ni a, Mizoram State Legal Services Authority-a thawktu ten Aizawl khawpui lunlai-ah te dan chungchang inziahna lehkhabu te an sem bawk a. District hrang hranga District Legal Services Authority te pawhin Legal Services Day pual hian Jail-ah leh hmun hrang hrangah mipuite dan zirtirna hun an hmang bawk a ni.